جات لخبار.. ياصاحبي

نعزي راسي فيك.. ياااا بوعزة… بك نسيت لكره وعرفت لمعزة… ونعزي كاع الناس اللي عرفوك… سخي وقت الرخا وكذاك فالحزة.
يا صاحبي
يا اللي أنت مني
على غفلة
منك ومني
جات لخبار جات لخبار
على غفلة
من سوايع السعد
على غفلة
من شلا ورد
وغفلة
من شلا طيار…
***
جات لخبار
لاحڭة ل»تاغارت»
حڭلها لطيار
ما غنات ما طارت
حڭ لو لبحر
هذ الليلة ساكت
ونجومو غايبة في سماه…
***
جات لخبار
ومن فضالة داعت
وفضالة مفضلة
ف ڭلبو
محبتها فاضت
حتى هي شحال
بكات وناحت
اڭول شدت حق لله…
***
جات لخبار
في ثلث حروف تڭالت
في ثلث سيوف تصابت
طعنت الجوف وغابت
الميم
والليف
والتا
تلموا والمنعوث انت
الزين
صابتو شحال من «لولا»
والليل
تزاد في لكحولة
طاحت نجمة
من سعد الظلمة
وبالهموم
وبالحموم
تكحلت شوفة بنهار…
***
يا صاحبي
وصاحب ڭاع الناس
قساحت لخواطر
وخاطرك بقى حاس
تبدلت لخواطر
وخاطرك بقى عاس
على لمة
بغيتيها ملمومة
على كلمة
عشقتيها منغومة
وعشقتي اهل العشق
جامعاهم حلمة
وجامعاهم بالمحبة دار…
***
يا صاحبي
يا عشيق لحروف
يا عين ساهرة
عل لحباب تطوف
ضاحكة
الا زهر البوح
باكية
الا تغربت الروح
ساكتة
وفي سكاتها تنوح
لكن الشوفة
ديما مشرفة
ف الفوڭ تشوف
وف ساعة لمعاندة
وسوايع لمناكدة
باللين والسماحة
والدمعة السايحة
شوفتك ياصاحبي
ديما رابحة لخطار…
***
يا صاحبي
وصاحب هذ الناس
المجروحة
محبتك
محفورة وشام
والڭلب لوحة
لا صلصال ليوم يمحيها
ولا خبا النسيان يغطيها
محبتك
سكنت الخاطر خاطر
سكنت الخاطر
بلا منة وبلا تحزار…