الساف وولد موكة

كانت الحكاية بالإضافة إلى كونها وسيلة للترفيه و التسلية ، و غمر المتخيل الطفولي بالرغبات التي تتحقق بسهولة، وسيلة للتربية و التنشئة الاجتماعية للفرد و المجتمع.
تبتدئ الحكاية بقول السارد:
«عمر ولد موكة ما يكون بحال الطير الحر»
ويعقب السامعون على قوله:
«وانا وانا»..
ويضيف السارد، متذكرا
«ما عرفت آسمو هذاك ولد موكة.. بوبكر، بوبكر»..
ليبدأ الحكاية:
كان حتى كان، في ما مضى من الزمان، حتى كان الحبق والسوسان في حجر النبي العدنان، عليه الصلاة والسلام..
-»قالك: جات موكة عند الساف بغات تخطب، إيوا دقات خرج الساف قال ليها:
-»آش خطرك؟»..
قالت ليه:
«بغيت بنتك لولدي»
قال ليها:
«لا ما شفتش الدري ما غذي نعطيك بنتي»
قالك مشاو نعم أسيدي.. واحد النهار موكة هي تقول لولدها قالت له:
-»آش تديري؟ كون شخص، راه بغى يجي الساف يجربك يشوفك واش شخص ولا ما شخصش».
جا لقى بوبكر مسيكين موقظ (ضحك الجمهور) دق خرجات موكة، هي وولدها، قالت ليه:
«هو هذا»
قال لها:
«نخرجو للخلا نجربو ونعرفو واش يعرف يضرب الحمام ولا لا».
قالت له:
«سير».
بوبكر مشى، ركب حتى هو طار، طار هو والساف، زيد زيد زيد، الساف شاف جوج حمامات كاينين حدا واحد الغديرة، كايوردو قاليه:
«وابوبكر شفتي شي حاجة ولا لا؟»
قال ليه:
«ما زال ما شفت والو»
قال ليه:
«هذا قفّرها»
قال ليه:
«شوف عند المرجة آش كاين؟»
قال ليه:
«هذوك كيوردو»
قال له: يالله هود»
قاليه:
-»انت هود انت الأول».
الساف هود هو يضرب وحده، وهو يحطو ثاني واحد الجوجات خرين، جاو حطو إيوا بقات الدورة لبوبكر قال ليه: «هود».
غا هود خلى لحمامات لهيه وهو يرشق منقارو فلغيس (ضحك).
رشق منقارو فلغيس وهو يوحل:
«فين هو ما فين هو؟»
الساف ما تلاش لقاه، جاو شي دراري هما يلقاوه هما يديوه يلعبو بيه، الساف دّا ذيك الحمامة.
جات موكة وهي تقول للساف:
-»وافين هو الدري؟»
قال لها: «عاهدي به فواحد الغديرة، بغى يضرب شي حمامات ما تلى طلعش ونا نزيد بحالي».
قالت ليه: «ها العار إيلا ما جيب ليّ الدري، أنا ما تليت خصني لا خطبة ولا شي حاجة».
-»آش أوا كتقولي؟».. «جيب ليّ الدري، فين ما كان يجي».
الساف طار، مشى لقاه تيلعبو بيه شي دراري، بوبكر، ها واحد يلوحو للاخر..
(تعليق الجمهور واش ولد موكة تيدير الفرح؟)
«قاليك:
«برز هو يخطفو للدراري من يديهم قال له:
-»أنت مالك آش طرى لك؟»
-قال ليه:
-»أنا ما كنتش بغيت نضرب وحدة، بغيت نضرب جوج».
ومشات حجايتي من لواد لواد وبقيت أنا مع ولاد لجواد.
المصدر: الدكتور محمد فخرالدين -كتاب موسوعة الحكاية الشعبية -الحكاية 15
انتظروا غدا حكاية أخرى الغزالة ذات قرن ذهب وقرن فضة.
المصدر : الدكتور محمد فخرالدين كتاب موسوعة الحكاية الشعبية