حوار بين شاب ثوري ومواطن طيب

تم الحوار بالصدفة، كان الشاب الثوري جالسا على مقهى في وسط البلد وقد وضع على المائدة أمامه لافتات تحمل شعارات سياسية، وعلى المائدة المجاورة جلس رجل
خمسيني أصلع راح يشرب الشاي بالنعناع ويدخن الشيشة في تلذذ واضح.. تطلع الرجل إلى الشاب ثم سأله بأدب:
- لا مؤاخذة.. ممكن أعرف إيه اللافتات دي..؟!
- دي لافتات حنرفعها يوم الجمعة 25 يناير في المظاهرات بمناسبة الذكرى الثانية للثورة.
- هو انت من شباب الثورة..؟!
- أنا واحد ضمن عشرين مليون مصري قاموا بالثورة.
- بصراحة، أنا ماشتركتش في الثورة، اتفرجت عليها في التلفزيون. أنا واحد من اللي بيقولوا عليهم حزب الكنبة. كنت ضد مبارك، طبعا، وفرحت لما تنحى، لكن عمري ما مشيت في مظاهرة.. باقولك إيه يا بني مش كفاية علينا مظاهرات؟!. إحنا عاوزين استقرار، عاوزين عجلة الإنتاج تدور.
- الاستقرارْ لا يمكنْ يحصلْ إلا لما الناسْ يحسوا بالعدل، ثم إن التظاهر السلمي من حقوق الإنسان. كل الدول الديمقراطية فيها مظاهرات يوميا واقتصادها لم يتأثر. نظام الإخوان زي نظام مبارك بيرمي فشله على شماعة المظاهرات.
- طيب، ممكن تقول لي الهدف من مظاهرات يوم الجمعة..؟!
- سنتظاهر لأن شيئا لم يتغير بعد عامين من الثورة، بل على العكس تغيرت أشياء كثيرة إلى الأسوأ، حكم الإخوان زي نظام مبارك. نفس الاستبداد والظلم والقمع والغلاء والفقر والبطالة.. الاعتداء على القضاء ومحاولة استغلاله، إرهاب الكتاب والصحفيين ومحاكمتهم بتهم زائفة مثل إهانة الرئيس وازدراء الأديان، المحاكمات العسكرية للمدنيين، الاعتقال والتعذيب في الأقسام، هات لي شيئا واحدا تغير عن أيام مبارك.
- لكن الرئيس مرسي بقى له ستة أشهر فقط في الحكم وهو بيقول اصبروا واعطوني فرصة.
- اسمع يا حاج، الإنسان لما يوعد مش المفروض يوفي بوعده..؟!
- طبعا.
- لو أنا وعدتك عشر مرات وكل مرة أخلف وعدي، هل لو وعدتك بعد كده تصدقني..؟!
- لا طبعا، لو صدقتك أبقى عبيط.
- أهو انت قلت بنفسك، الشعب المصري مش عبيط. على فكرة، أنا في الانتخابات الرئاسية رغم أني ضد الإخوان عصرت على نفسي ليمونة وانتخبت مرسي ضد شفيق. قلت لنفسي، الإخوان مهما كانت عيوبهم حيبقوا أرحم من نظام مبارك، لكن للأسف طلعوا الاتنين حاجة واحدة.. كنت أتمنى أن يكون الرئيس مرسي كما وعد.. رئيسا لكل المصريين، لكنه أثبت أنه رئيس للإخوان فقط، وبقية المصريين لا يهمونه في قليل أو كثير.
- الإخوان بيقولوا لازم ننتظر أربع سنين قبل ما نحكم على الرئيس مرسي.
- بص يا حاج، افترض أني اتفقت معاك أني أوصلك بسيارتي إلى الساحل الشمالي، ثم أخذتك في الاتجاه العكسي إلى طريق الصعيد، هل ضروري أنك تنتظر لغاية لما نوصل الصعيد عشان تعترض...؟!
فكر الرجل قليلا، ثم قال:
- لا طبعا، لازم أطلب منك ترجعني فورا لطريق الساحل اللي اتفقنا عليه، يا إما تنزلني من السيارة.
- هي دي حالة مصر بالضبط.. مرسي بدل ما ينفذ وعوده بينفذ تعليمات مكتب الإرشاد، وهو غير مهتم بأي حاجة إلا مصلحة الإخوان. مرسي يعمل على تمكين جماعته من الدولة، بحيث يستحيل بعد ذلك خلعهم من الحكم. لا يمكنْ ننتظرْ أربع سنوات حتى يتم تنفيذ مخطط مكتب الإرشاد.. إما أن يعدل مرسي أو يرحل.
- ما تنساش إنه رئيس منتخب.
- صحيح، الرئيس مرسي منتخب لكنه أخل بشروط انتخابه. أنت تنتخب الرئيس وفقا للقانون، فإذا جاء هذا الرئيس ودهس القانون بقدمه وحصن قراراته ضد القانون وسمح بحصار المحكمة الدستورية العليا حتى لا تصدر أحكاما ضد اللجنة التأسيسية الباطلة التي شكلها.. إذا فرض الرئيس المنتخب علينا نائبا عاما بالمخالفة للقانون، وإذا طلب هذا النائب العام من المحامي العام حبس مواطنين أبرياء حتى لا يحرج الرئيس يبقى نثق إزاي في النائب العام أو في الرئيس نفسه.. إذا فرض الرئيس على الشعب دستورا لا يمثل إلا جماعة الإخوان عن طريق استفتاء مزور.. إذا فعل الرئيس المنتخب كل ذلك فلا بد أن يفقد شرعيته قطعا، لأن الشرعية مستمدة من احترام القانون والحاكم عندما يهدر القانون يبقى غير شرعي.
- ممكن أسألك سؤال وما تزعلش مني..؟!
- تفضل.
- هو انت علماني شوية..؟!
- قصدك إيه بالضبط بكلمة علماني..؟!
- بصراحة، إمام الجامع اللي باصلي فيه بيقول إن كل اللي بيعارضوا الرئيس مرسي من العلمانيين الرافضين لشرع الله وأعداء الإسلام.. بس انت شكلك ابن حلال.
ابتسم الشاب وقال:
- إذا كان المسلمون الأوائل انتقدوا تصرفات أبي بكر وعمر بن الخطاب رضي الله عنهما يبقى إحنا مش من حقنا نعارض مرسي؟! كلمة علماني معناها فصل الدين عن السياسة، يعني ممكن تبقى علماني ومسلم ملتزم. حضرتك، طبعا، تعرف سعد زغلول ومصطفى النحاس وجمال عبد الناصر..؟
- دول زعماء مصر العظام.
- كلهم كانوا علمانيين. مش معنى كده أنهم ضد الدين، بالعكس كانوا بيعتزوا بإسلامهم، لكن كان رأيهم إننا لا يمكن نبني دولة ديمقراطية حديثة على أساس ديني.
سكت الرجل وبدا عليه التفكير، بينما قال الشاب:
- إحنا الحمد لله مسلمون ونريد تطبيق شرع ربنا، لكن المصريين ما كانوش كفار قبل ما يحكمهم الإخوان. معظم القوانين الموجودة في مصر مطابقة للشريعة الإسلامية، وهذا رأي وزير العدل أحمد مكي، وهو ينتمي فكريا إلى الإخوان المسلمين، بالإضافة إلى أن الإخوان هدفهم الأساسي السلطة وليس الشريعة.
- إزاي..؟
- فيه مشروع اسمه الصكوك الإسلامية، سمعت عنه..؟
- بصراحة، ما ركزتش فيه.
- الإخوان عاوزين يؤجروا مصر مفروشة، أي واحد أجنبي يدفع يبقى من حقه يمتلك أي شيء في بلدنا حتى لو كان السد العالي أو قناة السويس.
- يا نهار اسود.
هكذا هتف الرجل بانزعاج، وشرح له الشاب مشروع الصكوك الإسلامية ثم قال:
- مشروع الصكوك الإسلامية رفضه مجمع البحوث الإسلامية، وأكد أنه مخالف للشريعة، ومع ذلك الإخوان مصممون على تنفيذ المشروع بالرغم من مخالفته للشريعة.. يبقى الإخوان يهمهم تطبيق شرع الله..؟
- أعوذ بالله. بصراحة أشكرك لأنك شرحت لي الوضع. فعلا، المفروض تحاولوا بكل طريقة توقفوا المشروع ده لأنه خطير.. إزاي نبيع بلدنا يا ناس..؟!
- الصكوك الإسلامية واحدة من كوارث كتيرة عملها حكم الإخوان في 6 شهور... الإخوان اعتدوا على حقوق المصريين وفرضوا عليهم دستور المرشد بالعافية عن طريق استفتاء مزور. بعد عامين من الثورة، لسه المصريين بيموتوا في القطارات، والعمارات بتقع عليهم لأنها بدون ترخيص، لسه بيتحاكموا عسكريا وبيتعذبوا في الأقسام.. لسه المصري في الخارج مالوش قيمة ولا كرامة.. نجلاء وفا وأحمد الجيزاوي وغيرهم كتير اتحبسوا واتجلدوا ظلم في السعودية. مرسي قلب الدنيا عشان 11 إخواني اعتقلوا في الإمارات، بينما المعتقلون المصريون في كل دول الخليج ولا بيسأل عنهم مرسي ولا بيعمل لهم حاجة.
- لماذا لا تغيرون حكم الإخوان عن طريق الانتخابات..؟!
- أي انتخابات ديمقراطية في العالم لها شروط، من أهمها الشفافية وتكافؤ الفرص.. أين هي الشفافية والإخوان والسلفيون ينفقون ملايين أثناء الانتخابات من أموال مجهولة المصدر وهم يرفضون خضوع ميزانيتهم لإشراف الدولة. إذا لم نعرف من أين ينفق الإخوان والسلفيون فلا شرعية لأي انتخابات، ثم أي انتخابات هذه التي تجرى وفقا لقانون يضعه مجلس الشورى الباطل بناء على تعليمات مكتب الإرشاد.
- يعني انت رأيك نقاطع الانتخابات..؟!
- لقد أعلنا عن شروط لنزاهة الانتخابات لو لم تتحقق سنقاطعها.
- كلامك مقنع، لكن تفتكر أن المظاهرات ممكن تجيب نتيجة..؟!
- المظاهرات دي هي اللي خلعت مبارك وحاكمته ووضعته في السجن.
- يعني انتم عاوزين تخلعوا مرسي..؟!
- إحنا عاوزين حقنا.. حقنا نعمل دستور يعبر عن المصريين كلهم، حقنا إننا نتعامل بكرامة واحترام، حقنا أن يكون فيه عدل وحرية. حنستمر في الثورة لغاية لما نحقق أهدافها. لازم مرسي يحترم الشعب المصري ويلغي الدستور المشوه ويعطى المصريين حقهم في كتابة دستورهم. أما إذا رفض مرسي ذلك، فلا بد أن يرحل.
سكت الرجل المسن وتأمل الشاب لحظة، ثم قال بود:
- انت عندك كام سنة..؟!
- عندي 28 سنة وخريج هندسة القاهرة قسم مدني دفعة 2007.
- طيب يا ابني، انت شاغل نفسك في المظاهرات والاحتجاجات وبتعرض نفسك للخطر. ممكن تنضرب أو تموت لا قدر الله أو على الأقل يعتقلوك ويعذبوك.. ما فكرتش إنك تسيبك من وجع القلب ده وتشوف لك عقد عمل في الخليج.. تروح هناك تكسب وتكون نفسك وترجع بعد كام سنة تعيش في ملك.
ابتسم الشاب بحزن ثم نظر بعيدا كأنما يبحث عن كلمات مناسبة وقال:
- بص يا حاج، أنا اشتركت في الثورة من أول يوم وشفت الشباب بيموت جنبي. أنا شلت على كتفي ده شهداء وشفت ناس كتير فقدوا عيونهم من الخرطوش.. كان القناصة بيضربونا بالرصاص. دائرة الليزر كانت بتلف علينا وكل مرة تقف تنطلق رصاصة في دماغ واحد منا ويقع وسطنا. أنا كان ممكن أموت في أي لحظة، لكن ربنا أراد للشهداء أنهم يموتوا وسابني عايش لأجل أقوم بالمهمة اللي استشهدوا من أجلها. الشهداء ماتوا وهم بيحلموا بالعدل والحرية والكرامة وأنا حاستمر في الثورة لغاية لما أحقق حلمهم.
ساد الصمت لحظة، ثم قال الرجل المسن:
- بصراحة، انت وزمايلك شباب شجعان وعندكم حق تتظاهروا.
- إذا كنت مقتنعْ بكلامنا يبقى تنزلْ معانا يوم الجمعة.
- أنا عمري ما مشيت في مظاهرة.
ضحك الشاب وقال:
- ولا يهمك. انزل معايا المظاهرة وأنا حاخلي بالي منك.
ضحك الرجل والشاب وراحا يتفقان على موعد ومكان اللقاء في مظاهرات الجمعة.
الديمقراطية هي الحل.

علاء الأسواني