غير داوي

طَّنْ جَا
إذا قدّر الله وسقطت حكومة عباس الفاسي في القريب العاجل، فإن وزيرا واحدا على الأقل سيتأسف الشباب على رحيله. ذاك هو معالي وزير الشباب والرياضة مسيو منصف بلخياط الذي سيظل يحظى بالإعجاب والتقدير، ليس لأنه نجح في تحقيق إنجاز سيذكره به المغاربة طويلا، ولا لأنه أوفى بكل الوعود التي أمطر بها المواطنين، بل لأنه مختلف تماما عن كل الوزراء الذين عرفناهم، فقد كان وما يزال طلبُ مقابلة أي وزير في البيرو ديالو بدايةً لفيلم طويل من العذاب والإنتظار والتسخسيخ بلا فائدة، لكن منصف بلخياط هو الوزير الوحيد تقريبا في تاريخ المملكة الذي يمكن أن يلتقي به المواطن في أي وقت دون حاجة إلى وساطة ولا إلى موعد.. يعني إيلا بغيتي تتلاقا بيه، دخل غير شي سيبير في الدرب وتلقاه كيتسنّاك في الفيسبوك، وقت ما جيتي، بحال النهار بحال الليل... ديما هو أون لاين، يكفي أن تضغط بحركة واحدة «طّن» وتلقى الوزير «جا»، ولذلك فإن شعاره خلال هذه الأيام هو «طّن جا». وملعب طنجة هو الذي جعله أول وزير مغربي في التاريخ يستجيب فورا لمطالب الشعب، فقد طالبه الشباب مؤخرا بتغيير موعد افتتاح ملعب طنجة الدولي لتزامنه مع اصطدام الريال والبارصا فاستجاب في الحال على الفيسبوك دون حاجة إلى دراسة المطلب في مكتبه مع فريق عمله، وهكذا بضغطة زر حوّل موعد الإفتتاح من يوم الأربعاء إلى يوم الثلاثاء.
واش هو وزير ديال الرياضة أو لا ديال الشباب؟
بجوج، علاش؟
شفتو مقابل غير الرياضة، وعلاه ما في خباروش راه كاينين الشباب اللي عندهم القراية واللي عندهم الخدمة نهار الثلاث؟
خلّيه، مع هو ديما كيشاطي مع الشباب بالليل وبالنهار كيحساب ليه كلشي مْسالي قبّو.
لا يستطيع المرء بسهولة أن يفهم كيف يبرمج وزير موعد افتتاح ملعب طال انتظاره بمباراتين في كرة القدم في يوم عمل، فيوم الثلاثاء بالتأكيد غير مناسب لقطاعات واسعة من المجتمع المغربي وخاصة من جمهور الكرة، فالمشجعون ليسوا جماعة من العاطلين عن العمل ما عندهم غرض في الوقت، بل فيهم التلاميذ والطلبة، فيهم الموظفون والعمال، فيهم الحرفيون والتجار... يعني اللي كيقرا أو كيخدم ما يمكنش يوم الثلاثاء يكون حاضر، وحتى اللي ما خدامش، ما يمكنش يجي حيت نهار الثلاث خاصو يكون كيقلّب على خدمة، فهل يدرك السيد الوزير أنه بهذه البرمجة يقصي شريحة واسعة من الإحتفال بافتتاح ملعب طنجة؟ وهل يعي جيدا أنه يوجه بذلك دعوة مفتوحة فقط إلى نوع من المشجعين اللي الواحد فيهم داك النهار ما كيقرا ما كيخدم ما كيقلّب على خدمة؟ كنا نتمنى ألا يحرم الكثيرون من مشاهدة مباراتين قويتين تجمع الأولى اتحاد طنجة وأتليتيكو مدريد، وتجمع المباراة الثانية الرجاء البيضاوي وأتليتيكو مدريد عاودتاني.
واش باغي تسطّيني؟ واش أتليتيكو مدريد غادا تلعب جوج ماتشات مع جوج فراقي في نهار واحد؟
ما عندنا مانديرو، الناس ديال أتليتيكو مدريد جايبين معاهم ربعين لعّاب باغين كلهم يلعبوا، حشومة نقولوا ليهم لا، وهوما جايين فابور.
هادا هو الذل، وعلاش أسيدي في هاد الإفتتاح ما يلعبش منتخب الجنوب مع منتخب الشرق، ومنتخب الغرب مع منتخب الشمال... وتكون القضية واعرة؟
سْكت سْكت، واش اللعّابة ديال المغرب التطواني ما قدَرْنا نجمعوهم، عاد نجمعوا ربعة ديال المنتخبات من المغرب كلو.

نافذة
دخل غير شي سيبير في الدرب، تلقى الوزير كيتسنّاك في الفيسبوك