حنا خير منهم.. اللاعبين المغاربة واخا باقين صغار بانو رجال عنقو الجزائريين وواساوهم بروح رياضية

تعامل المنتخب الوطني المغربي للفتيان بشكل راقي بعد نهاية الماتش ضد الجزائر ضمن ربع نهائي كأس إفريقيا لأقل من 17 عام، واللي سحقو فيه الأشبال المغاربة الجزائريين بنتيجة 3 لزيرو.
اللاعبين ديال المنتخب الوطني المغربي بعد نهاية الماتش مشاو مباشرة عند اللاعبين ديال المنتخب الجزائري وبداو كيواسيوهم، حيث بان بلي اللاعبين الجزائريين كان عليهم ضغط كبير بسبب سلوكات وممارسات الكابرانات اللي ديما كيشحنو وكيحاولو يرجعو ماتش د الكرة حرب ومعركة.
اللاعبين الجزائريين بداو كيبكيو حيث خسرو مع المغاربة وبنتيجة كبيرة، والأشبال بداو كيعنقو فيهم وكيواسيوهم وكيخففو عليهم مرارة الهزيمة بكل روح رياضية، وهذا الشي عكس فينال كأس العرب اللي جمع بين المنتخبين وعرف اعتداء اللاعبين الجزائريين على المغاربة بعد نهاية المباراة، واخا المنتخب الجزائري هو اللي ربح الكاس بضربات الترجيح.
سلوك اللاعبين المغاربة وهم كيواسيو الجزائريين خلف ردود فعل زوينة عند الجزائريين، اللي فكل مناسبة كيتلعب فيها شي ماتش فيه طرف مغربي وآخر جزائري كيزيدو يقتانعو أن الصورة اللي كيحاولو الكابرانات يرسموها على المغرب كعدو وأن المغاربة أعداء لهم ماشي صحيحة وبلي الدولة المغربية والشعب المغربي ديما كانو وغيبقاو مادين يديهم بالسلم وحسن الجوار للجزائر وللجزائريين.