مجموعة أونكوراد بغات دير 30 كلينيك من دابا ل2026 حيتاش الخصاص كاين ومسؤول فيها: غانوظفو أطر صحية أجنبية مع مغاربة

الكلينيكات دالمغرب غاديا فالانتشار لتدارك النقص لي كاين فالعديد من المدن بحال الصويرة وكلميم الخ، وخاص مساهمة أكبر للقطاع الخاص. لذلك مجموعة أونكوراد المختصة في أمراض الكونصير دارت رفع رأس مال ديالها بدخول مستثمر فرنسي جديد اسمه ستوا Stoa لينضاف إلى CDG invest.
هاد جوج الشركات الاستثمارية دارو ضخ ديال 458 مليون درهم في رأس مال أونكوراد لدعم الاستراتيجية ديالها في التوسع وتم التوقيع مساء الخميس في كازا، على اتفاقية لتطوير البنية التحتية الصحية في المغرب.
المدير التنفيذي ديال أونكوراد رضوان السملالي، قال خلال لقاء التوقيع، إن المجموعة تهدف إلى بناء كلينيكات في مدن بحال الناظور وآسفي والصويرة، مضيفا أن المجموعة بغات دير 30 كلينيك من هنا ل2026.
ولكن القطاع الصحي، بالإضافة إلى البنية التحتية، خاصو الأطر الصحية المتخصصة لأن النقص حاد فالموارد البشرية بفعل هجرة الأدمغة وقلة إعداد الدكاترة والفراملية لي كايتخرجو.
السملالي قال في كلمة بمناسبة التوقيع إن الكلينيك ديالهم فأكادير غادي توظف أطر أجنبية إلى جانب أطر مغربية.
وكانت الوزارة قد سمحت للأطباء الأجانب بالممارسة في المغرب وشجعت القطاع الخاص على الاستثمار في المستشفيات.