مافيا كلينيكات الموت.. وزير الصحة والبرلمان والحكومة والنيابة العامة كيعاونوهم بسكاتهم يمصو دم المواطنين. غير فكازا امبراطور لكلينيكات ماتو عندو 5 بالڤيروس وخلصو 2 مليون لليلة

مافيا حقيقية ولاو دايرينها شي كلينيكات فكازا. زادو ترفحو مع ارتفاع ضحايا "كورونا فيروس". الحكومة ووزارة الصحة عطاتهم فاش يمصو دم فئات من لمغاربة.
شفنا شهادات صادمة. الدخلة لهاد لكلينيكات خاصك تحط 30 الف درهم وكاين اللي كيطلب كثر. ايسبيس. هنا مسؤولية الضرائب. عقلتو باش هدر عليهم الكاتب العام لوزارة المالية فندوة اش دارو ليه. بغاو ياكلوه.
هاد المافيا ما كتعقل على حتى حد. حتى الفارماصيانات ما رحموهمش. المكتب الجهوي لصيادلة الجنوب طلب من وزير الصحة، خالد آيت الطالب،، باش يفتح تحقيق فهذشي، وحتى فالجودة ديال الخدمات ديال هذ المصحات، بعدما توفى عضو فالمكتب نفسو، كان مريض بكورونا، وكان كيتعالج فواحد الكلينيك، ومات غير بعد سيمانة من العلاج ديالو فيه.
وقال المكتب الجهوي أن هذ المصحة طلبات من عائلة الفارماسيان 14 لمليون، عطاتهم منها 4 مليون كتسبيق، ومنين توفى السيد مابغاوش يعطيوه ليهم حتى يكملو ليهم 10 دالمليون اللي بقات، اللي كانو اتفقو عليها من اللول.
كلينيكات ما مسوقاش للقانون. نبيلة الرميلي، المديرة الجهوية للصحة فجهة كازا سطات، صرحات ل"كود" "لانام" حددات الأثمنة ديال كل حاجة متعلقة بالعلاج، وحسب كل فرد والحالة ديالو، وكتبقى هذ الأثمنة فيكس، ومايمكنش تجاوزها.
وزادت الرميلي أن المواطنين فحالة ما تعرضو بعض المواطنين للنصب، وخلصو أثمنة مرتفعة، أو تطلب منهم هذشي لاستقبالهم، فما عليهم غير يتقدمو بشكاية لدى المصالح المختصة.
وحسب قائمة الأسعار ديالها، اللي اطلعات عليها "كود"، "لانام" حددات الأثمن حسب حالة المرضى، ثمن التشخيص، والإيكوكَرافي، وثمن الأدوية اللي غيخصهم ياخدو، وحتى الثمن ديال دخول الإنعاش، وهو اللي كيبقى مرتفع نوعا ما (1500 درهم لليوم الواحد)، بالإضافة لثمن التقرير البيولوجي اللي كيدار بالنسبة للحالات الحرجة قبل من العلاج (2750 درهم)، بينما الحالات العادية والطفيفة فكيمكن تستفد من العلاج بثمن معقول.
وفق ما علمته "كود" فالبارح بوحدو ماتو عند امبراطور لكلينيكات اللي عندو جرادة وعدد اخر 4 فكلينيك و1 فكلينيك اخر اي 5 من اصل 29 ماتو فكازا كانو فهاد المصحات. فين هي الرعاية. والو. امبراطور الكلينيكات شرا 3 جداد
شهادات جمعاتها "كود" هدرات على التكرفيص ديال المرضى. رجل اعمال خلص لملاير وما لقاش حتى طواليط اعباد الله فكلينيك "عين البرجة" فكازا.
باش تدخل ريانيماسيون تحط جوج مليون. كل كلينيك وداير الطريفة ديالو.
دابا فين هي النيابة العامة اللي كاين اللي طلب منها تفتح تحقيق مع هاد المافيا وعلاش حكومة بنعرفة متواطئة معاها وفين هو وزير الصحة الفاشل فكلشي.
حنا فحالة طوارئ صحية وتقرر من اللول ان علاج كورونا تتكلف بيه الدولة. علاش الدولة ما ريكيزيوناتش هاد لكلينيكات.
عقلتو مراكش كانت فوضعية مقودة بزاف شي ايام. كان كلينيك دولي ديال شي حد اسمو بوشعرة ومعاه شي مسؤول كبير شريك. متا قربوش منو. خافو منو. الناس ماتو ولكن ما قربوش لهاد لكلينيك اللي عندو كلينيك اخر
الدولة فارضة على المواطنين اجراءات مقودة وقالت غادية تكلف بعلاجهم وخلات هاد المصحات يبيعو ويشريو علي ظهرهم. خلات مختبرات حتى هي كدير هاد العجب.
كاين استثناءات. كاين اللي دار خدمة مزيانة وبزاف وما تكرفصوش على المواطنين ولكن هادو قلال. كازا راه تقدر تنوض فيها شي فضيحة كبيرة وديك الساعة الدولة هي اللي غادية تورط بوحدها تخلص الثمن