لاعب بفريق أوروبي كبير قرر يلعب للمنتخب المغربي

من المنتظر تعرف صفوف المنتخب الوطني المغربي خلال الأشهر اللي جايا، انضمام لاعب جديد غيكون مفاجأة كبيرة بالنسبة للجماهير المغربية، وهذا الشي اللي كيفسر التصريح د الناخب الوطني وليد الركراكي فالندوة الصحافية قبل ماتش الرأس الأخضر ملي قال: "كاينين لاعبين مزيانين اللي يقدرو يجيو ويقدرو يعاونونا".
وكشفت مصادر مطلعة، أن الأمر كيتعلق بإبراهيم دياز نجم ريال مدريد الإسباني المعار لميلان الإيطالي، وأنه قرر يلعب مع المنتخب الوطني المغربي بعد صراع على الخدمات ديالو بين الجامعة الملكية المغربية لكرة القدم والاتحاد الإسباني، وأنه غيلتحق بالمنتخب الوطني المغربي فشهر سبتمبر الجاي، مراعات للظروف ديالو، خاصة بعدما يكون رجع يلعب مع ريال مدريد.
وكيتعتبر إبراهيم دياز من نجوم كرة القدم الصاعدين بالقارة الأوروبية، وكلشي كينتظر أنه يكون واحد من اللاعبين الكبار مع ريال مدريد الإسباني خلال السنوات المقبلة، والانضمام ديالو المنتخب الوطني المغربي غيعطي دفعة قوية ليكيب ناسيونال خصوصا على مستوى وسط الميدان الهجومي.