كيفاش احتقار الاحكام القضائية والادارية ولات رياضة وطنية. مواطن تخصص فتشهير وتشويه لموثقة واخا نصفها القضاء وهاد الاخيرة دعاتو ودعات معاه "الفرشة"

موثقة كازاوية حطات شكاية "من اجل التشهير ونشر صور" و"التهديد وادعاءات واهية والابتزاز والوشاية الكاذبة". الشكاية حطاتها هادي اسبوع امال مساندة٬ الموثقة بالدار البيضاء لوكيل الملك بالمحكمة الابتدائية الزجرية بالدار البيضاء. هاد الشكاية جات بعد تشهير كانت ضحيتو الموثقة من طرف سيدة وزوجها اللي محسوب من مغاربة العالم= الطاليان= وصاحب صفحة "الفرشة".
علاش؟
كانت شي عملية البيع والشرا ديال شراء 6 الشقق مازال كتبنى وتوقع هاد الشي فاكتوبر 2020 وعطا السيد وسميتو علي مابروك ومراتو حنان فاتح اللي كلشي فاسمها.
وقع خلاف بين الشاري علي مابروك وشركة العقار "لايف سكوير ومولاها حسن عاطل والموثقة ومحامي. حتى لهنا القضية مزيانة. اللي حس براسو مظلوم يمشي للقضاء. اللي قررها خاصها تطبق على كلشي. مول الديور الستة عطاتو مراتو النيابة وحط شكايات ودار مساطر قضائية وادارية ضد الموثقة.
فتح قاضي التحقيق بالابتدائية الزجرية دكازا سي محمد بشري فاول 2020 مع الموثقة بجنح التزوير في وثائق رسمية واخفاء حجج والمشاركة في النصب والاحتيال والتقصير وعدم التمييز وخيانة الامانة وتحقير مقرر قضائي واستغلال النفوذ. فمارس 2023 قرر قاضي التحقيق "عدم فتح تحقيق في مواجهة الموثقة امال مساندة" نفس الشيء للطاشرون وللمحامي.ستانف المشتكي وفشهر ماي 2023 صدرات الغرفة الجنحية بمحكمة الاستئناف بكازا في غرفة المشورة قرارها المؤيد للحكم الابتدائى "تأييد الامر المستأنف مع حفظ البث في الصائر". هادا حكم نهائي.
السيد مشى لوزارة العدل وقدم شكاية بها حقاش الموثق تابع لهاد الوزارة. مديرية الشؤون المدنية بوزارة العدل صدرات فابريل 2023 قرارها ب"عدم مؤاخدة الموثقة امال مساندة" بكاع دوك المخالفات المهنية المنسوبة ليها.
الفيلم كان ممكن يسالي هنا. مول الديور مشى للقضاء وحتى لوزارة العدل وكاين حكم نهائي برأ الموثقة. لكن هنا ناض مول الديور الستة اللي دارهم فاسم مراتو وبدا كيهاجم فالموثقة وخرج عليها فصفحتو وفصفحة "الفرشة" وكان ابتزاز ليها وكاين تسجيلات صوتية تقدمات فالشكاية فيها.
القضية دابا بيد القضاء. هاد الشي غريب. اللي بغى يمشي للقضاء خاصو يقبل بحكمو. اللي بغى يتشكى لوزارة العدل خاصو يتقبل قرارها. ما يمكنش لمواطن او مواطنة اعتقدت انها ضحية لموثق او لطاشرون او لاي واحد فالمجتمع ويمشي للقضاء وباش يخرج حكم ماشي غير يرفضو بل يهاجمو ويهاجم اللي نصفها القضاء.
هاد الشي غادي ويكثر. الدولة مسؤولة علي هاد الشي. التشهير بموثقة بعد صدور حكم قضائي امر خطير. تحقير احكام قضائية والتهكم عليها حاجة خطيرة بزاف. الموثقة كانت عندها الشجاعة ودعاتو. خاص كلشي يدير بحالها
خاص الدولة تاخد موقف واضح من هاد الابتزاز. كاينة صفحات مختصة فهاد الشي. كلشي كيتفرج. دولة الحق والقانون هي الخاسرة فهاد البيعة والشرية.