طنجاوة يرددون منذ ليلة أمس "المستحيل ليس طنجاويا" بعدما ضمنوا البقاء فالقسم الأول فريمونتادا تاريخية حيت كانوا فالدورة 17 عندهوم غير 2 نقط وكونداني طايحين

طنجاوة باتوا فايقين لبارح بالفرحة بعدما حقق اتحاد طنجة "حلم" البقاء في القسم الوطني الأول في ملحمة لم يسبق تسجيل مثيل لها من قبل في تاريخ البطولة الوطنية حيثاش عمر شي فرقة كان عندها جوج نقاط فنهاية دورة الذهاب قدرات تحافظ على بلاصتها فالقسم الأول.
الليلة ديال لبارح بصمات على إنجاز تاريخي غير مسبوق كان البطل ديالو هو فريق اتحاد طنجة لكرة القدم اللي قدر يحقق هدف كان كيبان مستحيل فنظر الجماهير الكروية وحتى الخبراء الرياضيين.
اتحاد طنجة غدي يلعب العام الجاي مع فرق الصفوة بعدما ربح لبارح الماتش ديالو قبل اللخر فالمحمدية بجوج لواحد، وحقق هادشي دورة قبل نهاية البطولة فالوقت اللي كان الجميع حكم عليه فمنتصف الموسم بالنزول للقسم الوطني الثاني وبقاو كيشوفو غير شكون الفرقة الثانية اللي نازلة معاه.
لكن ماتشات الروتور كانت كلها بالنسبة لاتحاد طنجة فينالات وباراجات لعبوها الدراري بقتالية واجتهد المكتب المسير الجديد باش يوفر اقصى ما يمكن من امكانيات مادية ومعنوية للفريق باش يتصوفّا وداكشي اللي كان.
الجماهير بقيادة فصيل "هيركوليس" قدمات كولشي اللي عندها للفريق، كانوا كيعمرو التيران وكيشجعوا اللاعبين بطرق حضارية عجبات المغاربة كاملين، وزيد عليك الآلاف اللي كانوا كيسافروا مع الفرقة فجميع التنقلات ديالها وعمرهوم تسجل عليهم شي مشاكل ديال الشغب.
الوالي امهيدية من جهتو ساهم بشكل كبير فهاد الإنجاز، واخا قرر يشتغل فالخفاء ومابغاش يبان هاد المرة، لكن كولشي رد البال للنتائج الحسنة ديال العمل ديالو وقالوا عليه ناس مقربين منو ل"كّود" "انو كان واثق ومقتنع باللي الفرقة ماطايحاش" وهاد الثقة خداوها من عندو جميع مكونات الفريق من اداريين وتقنيين ولاعبين.
ليوم الهدف القريب تحقق لكن الأهداف ديال الفرقة دابا خاصها تتبدل باش مايعاودوش يطيحو فهاد الأزمات هادو، الريمونتادات مكيصدقوش كل عام، والمكتب الجديد خاصو يخدم من دابا بدعم من السلطات باش يخطط للموسم المقبل ويبدا بالميزانية هي اللولى.