سكوب. ولد عم الوزير البركة اللي قدم راسو صحافي طلع منتاحل صفة اخرى. مصدر من الشركة الوطنية للاذاعة والتلفزيون ل"كود": ما عطينا اعتماد لحد باستثناء صحافيي الشركة

قال مصدر من الشركة الوطنية للاذاعة والتلفزيون ل"كود" ان المؤسسة ما عتامدات حتى شي صحافي او كاميرامان ما خدامش مع قنوات الشركة٬ في اشارة الى صحافيين من "الرياضية" و"اس ان ار تي نيوز" وكاميرامان.
المصدر اكد ل"كود" باللي هادي مؤسسة عندها ضوابط واضحة بخصوص الاعتماد والتكليف.
مصدر اخر ل"كود" ما استبعدش يتابعو هاد الشخص بسباب انتحال صفة صحافي ديالهم.
"كود" سولات الشركة الوطنية للاذاعة والتلفزيون بعد ما ردد شخص قدم راسو صحافي باسم الشركة الوطنية للاذاعة التلفزيون فندوات مدرب المنتخب المغربي لكرة القدم للسيدات باستراليا. هاد الشخص حتى هو اعتماد الفيفا واسمو حسن البركة وهو ولد عم وزير التجهيز الامين العام لحزب الاستقلال نزار البركة.
البادج اللي عند هاد الشخص هو اعتماد جريدة "العلم" لسان حزب الاستقلال اللي كان مدير نشرها عبد الله البقالي باعتبارو رئيس النقابة الوطنية للصحافة٬ كان دار مراسلة للفيفا باش يحيدو اعتماد "مول القرد" اللي خداه باسم شي موقع اسمو "ماتش بريس".
يعني ان النقيب خاصو يراسل الفيفا باش يحيدو اعتماد حسن البركة.
هاد الشخص كان سول فاول ندوة صحافي مدرب المنتخب المغربي للسيدات بيدروس رينارد قبل ماتش المغرب المانيا بميبلورن باسم الرياضية. بعدها البارح 30 يوليوز بملعب كوبر باديلادي الاسترالية فماتش المغرب ضد كوريا الجنوبية سولو باسم "الشركة الوطنية للاذاعة التلفزيون" =اس ان ار تي".
دابا طلع ماشي صحافي حقاش ما عندوش بطاقة الصحافة ديال المجلس الوطني للصحافة. ما عندوش اعتماد التلفزيون المغربي. ادارة هاد الشركة ما فراسهاش.