فضايح المونديال. ناشر "العلم" ورئيس النقابة البقالي كاعي على مؤثرين عندهم اعتماد فمونديال استراليا ونسى واحد معتمد من جورنالو وكيبريكولي مع "الرياضية". اش عند البركة ولد عم زعيم الاستقلال بالكورة وبالصحافة

قال عبد الله البقالي رئيس النقابة الوطنية للصحافة المغربية وعضو المجلس الوطني للصحافة مكلف ببطاقة الصحافة٬ ل"تيل كيل" بالعربية باللي غادي يراسل الفيفا بخصوص اعتماد مؤثرين واشخاص غير صحافيين فتظاهرات كبيرة بحال المونديال. البقالي اضاف باللي "الاعتماد ديال الفيفا مفتوحة وقد يحصل مؤثر على اعتماد بلا ما يدوز على الجامعة". غير ماشي دقيق هاد الشي. مونديال قطر راه الجامعة الملكية المغربية لكرة القدم هي اللي فرقات "الكود" اللي يسمح للمعتمدين بالحصول عليه. يعني دورها كبير وبزاف. بمراسلة منها ما عمر شي نجار او مؤثر يتعتامد فشي تظاهرة. طبعا المسؤولية جماعية وديال كلشي. ديال الصحافة والصحافيين والمنشئات الصحافية والمؤسسات الصحافية اولا ولكن ماشي اخيرا.
غير اللي مثير فتصريح البقالي هو ان ركز على مراسلة الفيفا وهاجم عدم اعتماد وزارات ومؤسسات عمومية على مسطرة الصحافيين المهنيين واعتابر هاد الشي "جريمة". جريمة باش يدير شي حد خدمة صحافي وهو ماشي صحافي".
فمونديال استراليا للسيدات كاين شخص اسمو حسن البركة. كيعرفوه لمغاربة باللي قطع المتوسط بين المغرب واسبانيا سباحة. راه فاستراليا معتمد من قبل الفيفا. وشكون عطاه البادج؟ جريدة "العلم" ديال حزب الاستقلال اللي هو مدير نشر هاد الجريدة.
اي ان "العلم" عطات اعتماد لشخص منتاحل صفة صحافي ولا كان عندو بطاقة الصحافة هاديك فضيحة اخرى. فمونديال لعيالات عندو بادج "العلم" وفنفس الوقت كيدير برنامج للرياضية التابعة للشركة الوطنية للاذاعة والتلفزيون.
وشكون هاد البركة؟ هادا ولد سفير المغرب السابق فمدريد وفالرياض وولد عم باطرون حزب الاستقلال الوزير نزار البركة وشي حد من اولاد عمو هو اللي تزوج بالوزيرة البامية فاطمة الزهرا المنصوري
حاضين مول القرد. راه كاينين مالين حوايج كثيرة تلاحو على المهنة بحال داك سعد عبيد ورباعتو. اللي "دوزيم" تحدات كلشي وقالت باللي ما مسوقة لحتى انتقاد وغادية تستمر تبث هاد الحلقات التافهة ديالهم.
مول القرد عرانا ولكن حتى هادو عراونا