كلشي مسؤول على اللي واقع فاستراليا. مول القرد وعبيد وجبارة والطبيب الفاشل والكوميدية التافهة غير عراونا. الصحافيون مسؤولين. النقابة مسؤولة. الجرائد مسؤولة. المجلس مسؤول. النيابة العامة مسؤولة. الجامعة مسؤولة. الدولة مسؤولة

تصورو مول القرد كان كيلعب بالقرد ديالو ف"فان زون" بميلبورن قبل ماتش المغرب والمانيا نهار الاثنين 24 يوليوز 2023. كان كيلعب بقردو وهاز بادج "الصحافة" اللي عطاتو ليه "الفيفا" بتواطؤ مع شي جمعية رياضية عندها باع كبير فهاد التخربيق من كأس افريقيا بمصر ودوزو على مونديال قطر وكأس العرب......
لكن واش مول القرد للي لقى راسو فاستراليا صحافي٬ مسؤول علي هاد الشي بوحدو. واش الجمعية الرياضية اللي عطات لمسؤولين كبار فالدولة جوائز تكريمية باش تغطي على جرائمها٬ بوحدها اللي مسؤولة. طبعا اللا.
هادي مسؤؤلية الصحافة كلها. الصحافيون هما اللولين. فكأس افريقيا للامم بمصر كنا ف"كود" كتبنا باللي كاين واحد عندو سوابق وخدا بادج وباللي خطير يكون عندو اعتماد. شفناه من بعد ولى عندو بطاقة الصحافة كاع. كيفاش خداها واخا عندو سوابق؟ هادا شغل رئاسة النيابة العامة. شغل المجلس الوطني للصحافة للي عطاها ليه. من بعد غادي يولي كاتب عام للجمعية الخاصة بالصحافيين الرياضيين اللي باسمها جا مول القرد.
هادي مسؤولية الجميع. ماشي غير فهاد كأس العالم باستراليا اللي وقعو لفضايح. فكاع التظاهرات الرياضية كان البيع والشرا فالاعتمادات. كانو وحدين ما عندهم علاقة بالصحافة وكترسل ليهم الجامعة الملكية لكرة القدم "الكود" ديال الفيفا.
ولكن نبداو من اللول.
هادي مسؤولية الصحف المغربية لكبيرة الرائدة اللي ما كترسلش الصحافيين دياولها لهاد التظاهرات وكتخوي التيران.
هادي مسؤولية المجلس الوطني للصحافة اللي خاصو يرسل مراسلات لجميع المؤسسات العمومية والخاصة المغربية يهددهم ولا ينبههم ولا اي تخربيقة. يتواصل معاهم باش يقول ليهم: ممنوع تعطيو شي اعتماد لشي صحافي ما عندوش بطاقة الصحافة المهنية ديال المجلس.
هادي مسؤولية النقابة الوطنية للصحافة الرياضية اللي فشلات تجمع نقابات الصحافيين الرياضيين اللي كثرو بزاف بسباب لخواض. كانو جوج ولاو كثر.
هادي مسؤولية النقابة ديال الصحافيين الرياضيين اللي كتفرج هادي سنوات على هاد المهازل وساكتة. ما بغاتش تدخل فمعارك. ها النتيجة.
هادي مسؤولية فيصل لعرايشي ديال الشركة الوطنية للاذاعة والتلفزيون. مسؤولية سليم الشيخ ديال "دوزيم". هانو المهنة. احتاقرو الصحافيين دياولهم. عطاو مارشي فيه فلوس كثيرة لرباعة ديال الپاندية
هادي مسؤولية الجامعة الملكية لكرة القدم اللي كتقبل تعطي اعتماد لشي صحافي ماعندوش بطاقة الصحافة المهنية ديال المجلس الوطني للصحافة. خاص الجامعة ما تبقى تعطي حتى شي ريال للصحافيين اللي حاضرين لتظاهرات دولية. واخا مهنيين وعندهم بطاقة الصحافة. عندهم مؤسسات يتكلفو ولا يقلبو على مستشهرين لهاد الشي.
هادي مسؤولية رئاسة النيابة العامة اللي كيبان ليها وحدين منتاحلين صفة وحركاتش متابعة ضدهم. خاصها تابع هاداك سعد عبيد وهاديك هند جبارة كينتاحلو صفة صحافي وكيدوزو حقارتهم فدوزيم
هادي مسؤولية الحكومة حقاش عدد من الوزارات كيقبلو النجارة فانشطتهم وكيسكتو
هادي مسؤولية الدولة اللي عدد من اجهزتها كيخدمو هاد النوع او كيقبلو بيه وكيوظفوه.....
تقدر تزيد مسؤولية عدد من المتدخلين. المهم ماشي مسؤولية جهة وحدة. ماشي مسؤولية طرف واحد