وافينك المقدم فينك القايد فينك أوزير الداخلية وا فينك يا إدارة الدفاع الوطني وافينك أرئيس الحكومة راه الشواطئ المغربية مستعمرة من طرف صحاب الطبالي والكراسا والمغاربة ولاو محرومين من شواطئهم وهادشي كيوقع أمام وخلف أعين رجال السلطة في المغرب كامل

مايمكنش دولة على قدها ولي كيتعطى بيها المثال في محاربة كورونا يغلبوها صحاب الكراسا والطبالي والباراسولات والاستعمار الكلي لي دايرين لجميع الشواطئ المغربية، راه قريب يعلنوها دولة مستقلة راه هادي من أخطر الحراكات لي دازت في تاريخ المغرب، حتى شي حراك او ثورة او انتفاظة ماقدراتش تسيطر على متر واحد من الأرض وتحكموا بقوانينها إلا هاد اجتياح صحاب الكراسا حاكمين الشواطئ المغربية بقانونهم والمخزن ماقادرش عليهم أو مشارك معاهم حيت مايمكنش هاد السيبة.
وا سيدنا راه فاش كتكون في اليخت ديالك مقابل مع المضيق وكتشوف الشواطئ عامرة والمغاربة ناشطين والبحر كلو مضولة راه هادوك غير ديال المستعمرين الجدد للشواطئ المغربية، أما الشعب المغربي راه كيعاني يوميا غير باش يلقى بلاصة في البحر فين يحط كراساه ومضلو ويفرح مع ولادو راه كارثة حقيقية هادشي، البحر مستعمر والبر كذلك، ومابغاتش الدولة المغاربة يهربو ليها غير للصبليون هاهي حدانا لي شحال هادي كانت السياحة فيها حكر على لي لاباس عليهم، حاليا راح قل من الطبقة الوسطى ولاو يديرو بناقص من السياحة هنا باش يمشيو للصبليون او تركيا كيفضلو يدوزو سيمانة تما على شهر هنا ديال العصاب والفقصة والمضاربة اليومية مع المستغلين.
العطلة في المغرب أو السفر مابقاش نشاط ترفيهي بل تحول لمعاناة سيزيفية وحرب مفتوحة مع مستغلي الملك العام العساسة والگارديانات وصحاب الطبالي والكراسة، ومية طفل صغير كيدورو في البحر كيبيعو أي حاجة وصحاب كاو كاو لي مابقاوش كيبيعو ولاو كيطلبو تعاون معانا وشري من عندنا، وسبعمية الف طلاب وطلابة عاد زيد عليها صحاب الماكلة لي مضوبلين الثمن والجودة زيرو المهم عذاب في عذاب ماتما عطلة ماتما كونجي معاناة أزلية حتى في الوقت لي من المفروض تكون كتستمتع وترتاح وتصنت لعظامك، واش هذا هو المغرب لي بغينا مغرب المستغلين الجشعين والسيبة وانعدام المراقبة والدولة مخلية السوق سايب.