اعلان حرب ضد المغرب. نائبة من اليسار الراديكالي من البوليساريو فالبرلمان الاسباني بخارطة "الجبهة". علاش ما يلبسوش نوابنا خارطة كاطالونيا او الباسك او نابارا ويردو على الصبليون

اليسار الراديكالي الاسباني الممثل ف"سومار" خدا موقف عدائي ضد المغرب فاول جلسة لمجلس النواب الصبليوني اللي شكل المكتب ديالو البارح وانتاخب رئيسة ليه. هاد التجمع الراديكالي فيه نائبة طلعات فلائحتو من مدريد تيش سيدي وهي من البوليساريو وخدات الجنسية الاسبانية.
البارح دخلات للجلسة بتيشورط فيه خارطة المغرب مبتورة. دايرة للبوليساريو دولة. هادي انتاخبوها الصبليون باش دافع علي مصالحهم٬ اختارت اول ڤيترين ومنقول فالتلفزيونات باش دافع على مصلحة اللي رسلوها "البوليساريو".
هاد التجمع ديال بقايا اليسار الراديكالي فالصبليون ديما كان ضد مغربية الصحرا والغريب فهاد الشيوعيين جدا انهم مع "اسبانية" سبتة ومليلية. هادي ما يقدروش يقولوها. كان تيار يساري راديكالي عندهم الجرأة يقولو باللي سبتة ومليلية راهم مغربيتين. هاد التيار ما بقاش يحل فمو ولا يهدر.
دابا هاد التيار اللي كانت زعيمتو يولندا دياث هاجمات المغرب واعتبراتو ديكتاتورية٬ مستمرة فسياستها ضد المغرب من خلال هاد التصرف.
التيار هو حليف لرئيس حكومة سانشيث وبدعم هاد الحزب نجح الحزب الاشتراكي العمالي البارح باش يربح رئاسة مجلس النواب وبدا كيوجد باش يرجع للحكومة. ولا شكل اغلبية غادية تكون "سومار" جزء من هاد الاغلبية وغادي يسند ليهم مناصب وزارية ومنصب نائبة رئيس الحكومة كيف كان فالحكومة المنتهية ولايتها.
نواب مغاربة يقدرو يردو على هاد السياسة العدائية لليسار الراديكالي. يقدرو يلبسو تيشورات فشي جلسة من جلسات مجلس النواب فيها خارطة اسبانيا محيدين منها كاطالونيا او اقليم الباسك او نابارا او اراگون. خاص نوابنا تكون عندهم الجرأة يردو بنفس الاسلوب علي الصبليون.
دابا راه كاين توزيع المهام فالصبليون. كل واحد كيمارس دور باش يضغطو اثناء المفاوضات مع المغرب. سانشيث كان اعتارف بمغربية الصحرا فرسالة للملك محمد السادس. واش ممكن يتراجع عليها؟ كلشي ممكن مع سياسي كيهمو يبقى فمنصبو. واخا هاد الشي شوية مستبعد ولكن ماشي غير ممكن. المغرب خاصو يكونو عندو اوراق اخرى. اكيد عندو وخازنهم ولكن هاديك الدولة. دابا خاص نواب من مجلس النواب يبادرو. يردو على هادي ديال البوليساريو.