الحزب الاشتراكي الحاكم فالصبليون يرد على الوزيرة الشيوعية معاه فالتحالف واللي قالت باللي المغرب ديكتاتورية: هاداك رأي شخصي ديالها لا هو موقف حزبنا ولا حكومتنا

عارف الحزب الاشتراكي العمالي اللي كيقود الحكومة الاسبانية باللي وصف النائبة الثانية لرئيس الحكومة ووزيرة التشغيل والاقتصاد الاجتماعي يولاندا دياث للمغرب بالديكتاتورية غادي ينوض الصداع. الحزب خرج اليوم باش يتبرا من هاد الشي.
Ad
00:00
/
00:36
Ad ends in 35s
الناطقة الرسمية باسم الاشتراكيين ووزيرة التعليم بيلار اليگريا هي اللي ردات. قالت باللي اللي قالتو دياث "رأي شخصي" وباللي "ما هو رأي لا للحزب =الاشتراكي العمالي= ولا الحكومة =حكومة بيدرو سانشيث.
لكن دياث اللي كتمثل "بوديموس" فالحكومة واخا ولات بوحدها فحزب اسمو "سومار"٬ واللي هو تجمع لاحزاب يسارية راديكالية٬ كانت قالت هاد الشيوعية فحوار بقناة "لاسيكستا" البارح الاحد باللي ماشي غير المملكة ديكتاتورية بل ايلى ولات رئيسة الحكومة غادية تراجع على موقف بلادها الحالي من الصحراء٬ اي غادية ترجع كيف كانت قبل اقرار سانشيث باللي الحكم الذاتي هو الحل الوحيد لملف الصحرا اي خاصها تبقى تحت السيادة المغربية. قبل كانت اسبانيا ديما مع تقرير المصير.
طبعا هاد الوزيرة الشيوعية ما عمرها وصفات لا الجزائر ولا البوليساريو بالديكتاتورية وقل كوبا وفنزويلا. ما عمرها هدرات على سبتة ومليلية. باغية تهدر غير علي الصحرا.
حزبها صغير بزاف. اخر استطلاع للرأي خرج اليوم كيعطيه يجيب تقريبا 9 بالمائة ورا الحزب الشعبي ب28 بالمائة والاشتراكي العمالي اللي يقدر يجيب 22 بالمائة وورا حزب بوكس من اليمين المتطرف اللي يقدر يوصل حتى 15 بالمائة.
الوزيرة الاشتراكية قالت اليوم٬ حسب ما نقلته صحف ووكالات صبليونية٬ ان العلاقات مع المغرب واضحة وباللي كلشي واضح فخارطة الطريق اللي جات فالاعلان الاسباني المغربي يوم 7 ابريل من 2022 بعد لقاء اللجنة العليا المشتركة. فهاد الاعلان كاينة ضرورة احترام سيادة كل بلاد.