الصبليون كاعيين على حكومتهم. كيقولو باللي المغرب اللي متحكم فاللعب وكيحدد القواعد ديالو. صحافيوهم وسياسيوهم ما راضينش علاش ولى عندنا صوت خاص بينا ندافعو على مصالحنا

الغاء زيارة وزير الخارجية الاسباني الباريس للمغرب اليوم فاتح ابريل قلقات جهات فالجارة الشمالية. اعلامهم عكس هاد القلق هاد الصباح. سواء القناة الاولى "تي في او" او القنوات الخاصة ديالهم. كيف ما كانت الاتجاهات ما فهموش اش واقع. اللي قلقهم اكثر هو ان المغرب هو اللي متحكم فكلشي.
صحافية فبرنامج "لا اورا" =الساعة" على القناة العمومية لخصات هاد التقليقة. قالت باللي لحد الان ما قادر حتى حد فالصبليون يعاود لينا اش وقع بين المغرب واسبانيا. كتهدر على حكي قصة عودة العلاقات. اللي ما كيبغيوش يقولوه صحافيون من مختلف التوجهات تقريبا وحتى محلليهم السياسيين هو ان المغرب عندو صوت. ديبلوماسيتو اللي كيقودها رئيس الدولة ماشي هاداك لخفيف ديال بوريطة٬ بينات باللي سالى عهد ما نقلق حد وندير الخاطر لهادا ولداك. اليوم كاينة مصالح لبلاد اولا واخيرا. اللي معاها معانا واللي ضدها ضدنا.
هاد الڤيراج لكبير فديبلوماسياتنا ما قدرش العقل الاسباني يفهمها. كنهدرو على النخبة ديالهم. الدولة العميقة فالجيش والمخابرات والحكومة فهمات هاد الشي. جربات كلشي معانا وفشلات. دابا فهماتنا مزيان.
هاد الاسبان عندهم نظرة استعلائية على بلادنا. دولتنا فاهماهم مزيان. دابا اللي قلقهم بصاح غالبية صحافييهم ومثقفيهم هو ان رسالة رئيس الحكومة الاشتراكي سانشيث للملك محمد السادس واللي علن فيها دعم الحكم الذاتي المقترح من قبل الرباط للصحرا فتغيير غير مسبوق لهاد لبلاد٬ علن عليها بيان للديوان الملكي. علن عليها محمد السادس. عرفوها من عندنا.
حتى الاتصال البارح بين محمد السادس وسانشيت علن عليها بتفصيل بيان الديوان الملكي مرة اخرى. رئيس الحكومة دار تويت قصير. التفاصيل جات من عندنا.
العقلية الاستعمارية للي عند نخبة الجارة الشمالية ما كتسوعبش هاد الشي. تخربق ليهم الكارط ميموار ديالهم.
حتى النخبة السياسية ديالهم كان عندها اجماع غير مسبوق ضد موقف الحكومة من الصحرا. من حلفاء الحكومة واللي مشاركين فيها "بوديموس= اليسار الراديكالي= حتى اليمين المتطرف "بوكس". كلشي كان ضد المغرب ماشي ضد موقف الحكومة من الصحرا. حقاش خرجات ليهم هاديك العقلية الاستعمارية اللي معششة فيهم. بالنسبة ليهم الجار ديالهم مقودة عليه. فقير. خاصو يبقى تحت الصباط. باش خدا طريقو ودافع علي راسو٬ نسات الاحزاب ايديولوجياتها وعوضاتها تلك العقلية الاستعمارية. كتشوف فينا الجار الفقير لمگرد اللي خاصو يبقى هاكاك.
هاد النخبة ما فاقتش من الگلبة. خاصها شوية الوقت. هاد الزلزال غادي يرجعها للواقع. يخرجها من التاريخ الاستعماري.