الحزب الاشتراكي الحاكم فالصبليون: بوحدو ضد كلشي فقضية الصحرا. كلشي دار فيه: باش تمشي للمغرب عرف راسك بوحدك وهو رد: الرسالة ورقة طريق صلبة ومحتاجين للمغرب

"باش تمشي للمغرب فزيارة رسمية نهار فاتح ابريل عرف راسك باللي كاع الاحزاب من يمينها ليسارها ضد رسالة بيدرو سانشيث لملك المغرب. الحزب الاشتراكي العمالي الاسباني خدا قرار احادي الجانب لقضية فغاية الحساسية ويتعلق الامر بالصحرا". تقريبا هاد الرسالة تقالت باكثر من طريقة هاد العشية 23 مارس 2022 خلال مثول خوسي مانويل الباريس وزير الخارجية والاتحاد الاوربي والتعاون امام مجلس النواب.
كاع الاحزاب من الكبرى بحال الحزب الشعبي المعارض فالوسط الليبرالي "سيودادانوس" ثم اليمين المتطرف "بوكس" حتى اليسار بكاع الوانو من الجمهوريين حتى الاكثر راديكالية وزيد عليهم الاحزاب الانفصالية فكاطالونيا والباسك حتى حزب "بوديموس" المشارك فالحكومة٬ كلهم عارضو موقف اسبانيا الجديد. انتقادوه. هاجموه. عاودو هدرة كتكرر. تقرير المصير. الدفاع عن الشعب الصحراوي. بوليساريو الممثل الوحيد للشعب الصحراوي. مسؤولية اسبانيا التاريخية. ذكرو الحزب الاشتراكي ببرنامجو الانتخابي اللي علن على دعم مباشر للانفصاليين.... ومع هاد الشي هاجمو المغرب ووصفوه باوصاف قدحية تنم عن عنصرية مقيتة.
مداخلة وحيدة للفرق البرلمانية دافعات على الحكومة وهي لحزب رئيس الحكومة. دافع على مركزية قرارات الامم المتحدة فقضية الصحرا.
وزير الخارجية شرح موقف حزبو وعاود ذكر باللي قالو قبل. باللي قرار الحكومة ماشي جديد. سبق خداتو حكومات ثاباتيرو الاشتراكية وراخوي اليمينية. قال الباريس باللي رسالة سانشيث "ورقة طريق صلبة". انطلاقة مرحلة جديدة للعلاقات. مصالح الصبليون فهاد المرحلة الاقتصادية والامنية هي الاساس
وانتاقد التدخلات وقال باللي ما كتعطيش بديل لصراع طول 46 عام. هدر على سبتة ومليلية وقال باللي محتاجة للمغرب