الصبليون ما متحمسينش لزيارة سانشيث للرباط ولا للبيان المشترك: ما معاهش البرلمان وما دكرتيش اسبانية سبتة ومليلية والتأكيد على الحكم الذاتي فالصحرا كيهمك غير انت بوحدك

الصبليون ما استقبلوش البيان المشترك المغربي الاسباني البارح بعد لقاء رئيس حكومتهم بيدرو سانشيث بالملك محمد السادس فالقصر الملكي فالرباط بنفس الحماس اللي استقبلوه لمغاربة.
اللي تبع هاد الصباح بعض اذاعاتهم وشاف قنواتهم العمومية والخاصة ودار طلة على صحفهم كيبان ليه باللي النخبة فالجارة الشمالية طالع ليها الدم. مقلقها ان الثمن ديال تغيير 45 عام من عقيدة الدولة الاسبانية من الصحرا كيف دار رئيس الحكومة٬ كبير وغالي بزاف.
حتى فاولويات الملفات اللي هدرو عليها٬ فالقناة الاولى الاسبانية "تي في أو" فبرنامجها الصباحي "لا اورا" =الساعة=٬ كان هاد الموضوع ما كانش اول باش فتحو حلقة اليوم الجمعة 8 ابريل 2022. بداو بلقاء سانشيث البارح بزعيم المعارضة اليميني نونييس فييخو رئيس الحزب الشعبي.
عاد رجعو لموضوع الزيارة وحتى فهادا كان التناول ديالو مختلف. بداو بالتذكير ان زيارتو للمغرب بداها بلا دعم للبرلمان. بداها معزول سياسيا.
فالمضمون كانت تدخلات الحاضرين تقريبا كتقول نفس الهدرة. المغرب ربح الاشادة بالحكم الذاتي كحل واقعي وجدي وعندو صدقية. طبعا ما كيهدروش غير علي رسالة رئيس الحكومة للملك محمد السادس قبل ثلاثة اسابيع تقريبا بل كيهدرو على البيان المشترك اللي صدر البارح وفيه 16 نقطة باش ترجع العلاقات كيف كانت. اول نقطة كانت فهاد البيان المشترك هي الصحرا:
1-تعترف إسبانيا بأهمية قضية الصحراء بالنسبة للمغرب، وبالجهود الجادة وذات المصداقية للمغرب في إطار الأمم المتحدة لإيجاد حل متوافق بشأنه. وفي هذا الإطار، تعتبر إسبانيا المبادرة المغربية للحكم الذاتي التي قدمها المغرب سنة 2007 هي الأساس الأكثر جدية وواقعية وصدقية لحل هذا النزاع.
الصبليون ما فهموش كيفاش ف16 نقطة ما تجبداتش اسبانية سبتة ومليلية. ما قنعهمش رئيس الحكومة باش قال فالندوة الصحافية البارح باللي هاد المدينتين ما عليهم هدرة.
اللي حاولات النخبة كل جهدها تضرب زيارة سانشيث. صحافيوهم وسياسييهم ومحلليهم السياسيين. استعملات كاع الاسلحة لهاد الغرض. حتى برنامج جديد غادي يدوز فالقناة العمومية 2 الليلة "بلانو خينيرال" جاب بابلو اگليسياس زعيم "بوديموس" السابق. هاجم فهاد الحلقة اللي غادية دوز الليلة٬ موقف رئيس الحكومة من الصحرا واعتابرو "خيانة". خرج زعيم اليسار الراديكالي الحالم بالجمهورية للاعلام بعد ما غبر منذ استقلالتو من نائب رئيس الحكومة وكبوتو فالانتخابات الجهوية بمدريد.
الصبليون رسالتهم واضحة. ماشي معاك يا سانشيث. مع المغرب فقضية الصحرا نساو كلشي مشاكلهم بطريقة غريبة