سكيزوفرينيا نظام العسكر.. باغي يساعد المغرب وكيهاجمو فوكالتو.. كيفاش نقبلو مساعدة نظام أقصى طموحو يتشفى فالمغاربة ؟

Elouali.zaz.1987@gmail.com
سكيزوفرينيا نظام العسكر فالجزائر ما كتساليش ونهار على نهار كتزيد تبان للعالم، ففي الوقت لي كيتبجح هاد النظام بإستعدادو لتقديم يد العون المغاربة من بعد الفاجعة لي ضربات إقليم الحوز وتارودانت ومدن أخرى، والحصيلة الكبيرة ديال الخسائر البشرية والمادية، مازال وكالة أنبائو غادية فالترويج للبوليساريو والحرب الوهمية لي كتخوضها.
نظام العسكر بيّن بأنه بلا أخلاق، واخا روج عبر أبواقو وشياتة ديالو بأنه باغي يعاون وحنا متأكدين أنها فقط محاولة لإحراج المغرب وماشي بحسن نية، مازال هاد الوكالة ديالو مقابلة لكذوب والتدليس فإطار الهجمة الإعلامية ديال هاد النظام من بعد قطع العلاقات من جانب واحد، وما حتارماتش حتى الحالة ديال المغاربة وأزمتهم، وبينات فعلا معدن نظام العسكر المبني على العداوة ولاشيء غيرها.
فگاع العالم شفنا تضامن وشفنا إحترام للمغرب وشفنا دول غرضات مساعدتها وشفنا تعازي، ولكن هاد السكيزوفرينيا لي عايشها نظام العسكر عمرنا شفنا بحالها، بحيث أن وكالتو خدامة دون كلل أو ملل فنشر لكذوب على المغرب وحرب البوليساريو لي وصلات فبيانتها للبيان رقم 870 البارح الأحد.
كيفاش هاد النظام كيقول باغي نعاون المغاربة ؟ كيفاش بغاو المغاربة يقبلو هاد المعونة لي تعتبر بحال دس السم فالعسل، كيفاش المغربي يقبل مساعدة دولة مجندة كلها ضد سيادتو الوطنية، نظام ما خلا ما دار واستهلك گاع الأفعال اللا أخلاقية فسبيل أنه ينال من المملكة المغربية، ما يمكنش المغاربة يقبلو هاد المساعدة لي الغرض منها التصاور.
حقيقة الجزائر يمكن يطل عليها أي مغربي فوكالة أنباء الجزائر باش يشوف نظام العسكر شنو كيتمنى لبلادو وشنو كمية الحقد لي باغي يربيها فشعبو ضد المغرب، لدرجة مخصص زاوية فيها غير باش يروج لضحايا مغاربة فحرب وهمية ديال البوليساريو، راه مايمكنش نقبلو مساعدة نظام أقصى طموحو يتشفى فالمغرب والمغاربة.