والا عاوتاني ! السينيال راه مادارش باش تطبق الديكتاتورية ديالك على عباد الله و تفرض المحتوى لي بغيتي ! خلينا نتافقو انه ” التفاهة”!جزء من المحتوى لي كاين فالويب فالمغرب و فالدول كاملة ! تا المانيا و ميريكان فيها التفاهة !

ديما كانشوف عباد الله فالمغرب مناقشين على ” المحتوى” د الويب ! بالنسبة ليهم كاين بزاف د التفاهة ! و مؤخرا مع قلة مايدار و الجلاس فالدار بانو بزاف د الگروبات من شاكلة عصابات الشوارع فالفايسبوك لي الهدف منهم هوا قاليك ” يحاربو التفاهة” و يسدو القنوات لي هوما كايشوفوها تافهة!
اولا و بعد بسم الله الرحمن الرحيم ! راه مايمكنش ليك آ سي نمي تحارب شي حاجة لي نسبية و لي المفهوم ديالها يختلف من شخص لآخر ! داكشي لي كاتشوفو تافه راه ماشي بالضرورة كلشي كايشوفو تافه ! شنو هي التفاهة بعدا ؟! واش اي فيديو فيه الضحك و النشاط تفاهة ؟ و اي فيديو فيه معلومات طبية و علمية و الكوسينيس و السينيس ماشي تفاهة ؟! بهاد المعيار هذا خاصنا نحيدو تا الفيديوات الرائعة ديال حفلات البيتلز و ام كلثوم و العيوط و المسرح و جميع الفنون حيت اللحايا كايشوفو فيهم تفاهة ! و لا نحيدو الفيديو كليبات ديال سعد المجرد حيت شي ناس كبار عندهم ستين عام الفوق موالفين كايتسنطو غي لعبد الوهاب كايجيهم سعد المجرد تافه ؟! و لا نحيدو فيدوات الراب حيت صحاب الراي كايجيوهم تخربيق ؟! آشمن معيار عندك آ سيموحمد باش تقولينا نتا شنو لي تافه و لي ماتافهش ؟!
ثانيا السينيال مادارش باش الانسان يفرض وجهة النظر ديالو على عباد الله ! السينيال دار باش تحارب المحتوى لي فيه عنف او جنس او عرا او كذوب … يعني شي محتوى لي يمكن يشكل خطر على الفئات العريضة لي كاتفرج فيوتوب و لي فيها اطفال و شيوخ و شباب و عيالات و رجال ….
ثالتا ! التفاهة كاينة فگاع البلدان فالعالم ! حتى ميريكان لي ميريكان فيها محتوى تافه ! فحال لي عندنا و اكثر و تاهوما عندهم اسماء بيوتي و مي سعيدة ديالهم ! و فيديوات روتيني اليومي قبل مايبانو فالمغرب راه بانو فدول لي ” متقدمة” و كل فولا عندها كيال ! لي كايبغي التفاهة كايلقاها و لي باغي يتفرج فالطبخ كايلقاه و لي باغي يشوف القرودة كيفاش كايعيشو فادغال الكونغو راه تاهي كاينة!
خامسا حيت ماكايناش رابعا ! من العادي جدا انه التفاهة تسيطر على الويب المغربي و يكونو فيها ناس كايبدعو فيها ! هذا هوا قانون العرض و الطلب ! حنا شعب فيه نسبة امية مرتافعة و بنادم لي قاري قليل و حتى لي قاري باغي يفوج مع راساتو و ماغايبقاش مقابل غي القراية القراية القراية ! يعني هادشي لي عطا الله ! المغرب ماشي هوا السويد ! و نتا براسك عاد البارح كنتي كاتعاود لينا على مك لي تيقات بلي غايرشو الدوا ديال كورونا بالطيارات! ايوا دابا واش هاد مك و باك و خالتك و نتا نيت لاكنتي كاتجيب جوج فالماط واش قادين و مؤهلين تشوفو شي حاجة من غير التفاهة !؟
هاد الحروب ديال السينيال لي كاديرها بعض المجموعات فالفايسبوك راها كاتبين غي على واحد النزعة ديكتاتورية ففرض الرأي و اقصاء الآخر ! و لاماكنتيش كاتحمل التفاهة و باغي بصح تحاربها تقدر تعري على كتافك و تمشي دير محو الامية فالبوادي مثلا ! و لا تخرج تانتا بشي محتوى ” ماشي تافه” و تحاول تنجحوً فالويب ! و من غير الديكتاتورية كاينة تا ديك النزعة ديال بعض المغاربة انهم يعاونوك لا كنتي مقودة عليك و غير يشوفوك بديتي تربي شوية د الريش يهبطو على دينمك للراس باش ترجع تقواد عليك و هادشي لي وقع مع بزاف د اليوتوبوزات.