بوغطاط المغربي: الإرهابي محمد حاجب فاش مَصوّر والو من ألمانيا ولا كيتهمها بارتكاب انتهاكات لحقوق الإنسان.. واش هذا ابتزاز جديد؟ ولا الصهد ديال الفشل لي طلع معاه؟

تحية بوغطاطية للجميع،
بعد غياب لمدة طويلة لأسباب خاصة، هانا رجعت من جديد. وهاد المرة بوغطاط المغربي غادي يرجع بقوة وفي حلة جديدة، وغادي نتناول معاكم ملفات وحقائق مثيرة وغير مسبوقة على كل من تسول له نفسه ينوي الشر لهاد لبلاد العزيزة وعلى رأسهم المرتزقة "المغاربة"، وحااااشا واش يكونو مغاربة والمنتمين للطابور الخامس لي باعو راسهم رخاص للبراني ضد فالمغرب والمغاربة.
وأنا كنستعد نرجع للنشاط الديالي، درت واحد المراجعة لداكشي لي فاتني وطبعا كاين شلا ما يتقال وشلا ما نعلق عليه وشلاااا ما غادي نشارك معاكم كمعطيات وملفات مفصلة ومثيرة على رباعة الفاشلين من أشباه المعارضين والمناضلين الشلاهبية والمبتزين، لي تفرشو بلا قياس مؤخرا لدرجة حتى لي مخدمينهم ومحرضينهم ضد المغرب، بداو كيفكرو يستغناو عليهم، وكاين منهم لي ستغناو عليهم وكيفكرو غير كيفاش يتفكو منهم ويرميوهم فأقرب زبالة بحال شي كلينيكس.
ومن أبرز هاد الناس فديك الرباعة هو الإرهابي محمد حاجب المقيم بألمانيا، لي دخلات معاه الحكومة الألمانية فمواجهات قضائية حسب القول ديالو هو.
هاد ألمانيا لي مابقاتش فعينين الإرهابي الشلاهبي دولة الحق والقانون وحقوق الإنسان.
ييييه يا وليدي يا حويجيب، فيييين يامات كنتي كتقول "هادي راه ألمانيا أ حبيبي ماشي المغرب" فييين يامات "هادا راه القضاء الألماني أحنيني، ماشي قضاء النظام البوليسي الإجرامي"، فيييين يامات "أنا ألماني وانا محمي بالقانون والدستور الألماني وانا أتمتع بحقوقي بكل حرية و و و و"، فين هادشي كامل يا حويجيب؟؟ صافي دابا، ألمانيا ولات منافقة؟ ألمانيا ولات مصلحية وكتقلب غير على المصالح ديالها حتى ولو كان ذلك على حساب حقوق الإنسان؟؟
الإرهابي حاجب لي كان كيتبجح بأنه ألماني ويتمتع بكاااافة حقوقه وكان يتوعد المغرب بلي ألمانيا غادي تجيب ليه حقو وبلي حكا والواد غادي تحاكم ليه الجلادين الوهميين ديالو و و و، فجأة ما بقاتش دولة الحق والقانون وولات دولة منافقة من وجهة نظره، وولات دولة القانون غير مع الشعب ديالها. تا كيفاش غير مع الشعب ديالها؟؟ واش حاجب ما محسوبش معاهم، ياك عندو الجنسية الألمانية؟؟
والله العظيم إيلا حاجب لي قالها بعظمة لسانه، قالها فمرات متكررة فالفيديوهات ديالو فالآونة الأخيرة، بلي ألمانيا كتقلب غير على المصالح ديالها ولو كان ذلك على حساب حقوق الإنسان، ولكن قال بلي ماشي مع الألمان الأصليين.
شنو زعما؟؟ حاجب باغي يوهم الرأي العام بلي حكا ألمانيا كتتعامل معاه على أنه ماشي مواطن ألماني لمجرد كونه من أصل مغربي أو لمجرد كونه "مسلم"؟؟؟ زعما ديك اللعبة ديال نفاق أوروبا والدول الأوروبية في التعامل مع حقوق الإنسان؟؟ ديك اللعبة ديال كون كنت أوروبي بصح كاع ماكانو غادي يتعاملو معايا هكا؟؟
هادشي لي كيحاول هاد الإرهابي الشلاهبي يستغلو ويلعب بيه كورقة فااااشلة فالآونة الأخيرة، وولا مقابل وزيرة الداخلية الألمانية فتويتر، فينما تكتب شي حاجة على حقوق الإنسان أو شي حاجة متعلقة بالتعويضات، تلقاه نقز يعلق ليها وينتقدها.
والحقيقة أن الدولة الألمانية ماشي كتتعامل مع حاجب بأنه مواطن من الدرجة الثانية، وإنما تتعامل معه كجهادي سابق وشخص متطرف حيت عارفة حقيقتو، كيفما عارفة الحقيقة ديال بزاااف د الإرهابيين لي عايشين فوق التراب الألماني لي مستغلين القانون الألماني تحت ذريعة اللجوء وحقوق الإنسان ومستفدين من امتيازات الدولة على أنهم مضطهدين أو معرضين للخطر في بلدانهم الأصلية، بينما هم فالأصل إرهابيين ومجرمين، حسب ما كان أكد واحد الخبير ألماني فشؤون الجماعات الإرهابية، من مور الهجوم لي كان نفذو الإرهابي أنيس العامري لي حذرات منو المخابرات المغربية نظيرتها الألمانية ولي مع الأسف ماخذاتش داك التحذير بجدية.
وللإشارة، فسنة 2016، وزير الداخلية الألماني فداك الوقت، كان تقدم بواحد القانون يقضي بإسقاط الجنسية عن الجهاديين مزدوجي الجنسية. وصرح الوزير خلال مؤتمر صحافي بأن "الألمان الذين يشاركون في المعارك في الخارج لحساب ميليشيا إرهابية ويحملون جنسية أخرى يجب أن يخسروا في المستقبل جنسيتهم الألمانية".
أنا بعدا كبوغطاط وبغض النظر على كم المعطيات الحصرية لي عندي على هاد الإرهابي ولي غادي يجي الوقت المناسب باش نكشفها، ويعلم الله واش وثائق أو فيديوهات أو صوتيات... مااااا تعرف لايكون فيهم شي تصاور أو فيديوهات ديالو من قلب مخيمات الجهاديين الإرهابيين ديال القاعدة، أو شي مقاطع لحظة إلقاء القبض عليه من طرف السلطات الباكستانية وهو هاز كلاشنكوف أو شي مقاطع أثناء التحقيق معه من طرف المخابرات الألمانية فالمطار باش قرر هو بنفسو وبإرادته الشخصية أنه يسافر للمغرب بعدما منعوه يدخل لألمانيا لأنه كان يشكل خطرا على الأمن الألماني.
ماااا تعرف مااا تعرف ههههه كولشي ممكن، وماشي بالضرورة بوغطاط المغربي هو لي يكشف على هادشي، بوغطاطات عطاااهم الله فأرض الله الواسعة... يقدر يكون بوغطاط ألماني كاع هو لي يكشف هادشي هههههه. مهم ماعلينا.
بغض النظر على هادشي كاااامل، واحد السؤال لي كان محيرني شحاااال هادي وكنتمنى الإرهابي محمد حاجب تكون عندو ذرة الشجاعة والرجلة (لي مافيهش البتة ههههه) يجاوب عليه.
علاش عمرنا ما شفنا أو سمعنا الإرهابي محمد حاجب كيدير فيديوهات بالألمانية ينتقد فيها السلطات الألمانية بحال لي كيدير مع السلطات المغربية؟؟ علما بأنه كيتهم المخابرات الألمانية بلي تواطأت مع نظيرتها الألمانية ضدو وبلي كانت السبب فالترحيل ديالو تعسفيا وتعرضه للتعذيب المزعوم لي تفضح مؤخرا فالتقرير الأخير ديال لجنة مناهضة التعذيب لي أكدات بلي حاجب ما قدم حتى شي دليل على الادعاءات ديالو.
علاش حاجب كيكتفي غير بشي شويكيك ديال التعليقات خفيفة ظريفة فتويتر على وزيرة الداخلية الألمانية، عوض مايدير فيديوهات مطولة يحكي فيها بالألمانية كيفاش رحلاتو المخابرات الألمانية ومنعاتو من دخول ألمانيا رغم كونه مواطنا ألمانيا؟؟ اه ؟؟ علاش مايديرهاش؟
ياك ألمانيا بلد الحريات؟ وبلد يحترم حرية التعبير؟ إيوا عبر عبر أحويجيب على التعسف لي تعرضتي ليه من طرف السلطات الألمانية؟؟ ما قادرش؟؟ أو خايف؟؟ علاش الإرهابي حاجب، في تعامله مع السلطات الألمانية، كيلجأ للقضاء وداكشي حسي مسي ولكن مع المغرب داير جوج قنوات على اليوتيوب، وزايدها محزم بدوميا وزكيكو وفسيسيحة وعليلو باش يروج للأكاذيب ديالو؟ علاش؟
علاش مثلا، مايديرش واحد الفيديو غييير ديال 2 دقايق أو 3 دقايق يهضر فيه بالألمانية، يقول فيه مثلا: "أنا محمد حاجب، مواطن ألماني، مقيم بالعنوان الفلاني، جيت لألمانيا فسنة كذا وحصلت على الجنسية فسنة كذا... أتهم السلطات الأمنية الألمانية بأنها قامت بترحيلي تعسفيا للمغرب تحت ذريعة خطر الإرهاب وبسبب هذا الترحيل تعرضت للتعذيب واليوم أطالب الدولة الألمانية أو القضاء الألماني بإنصافي وتعويضي وملاحقة الجلادين".
فكرة زوينة ياك؟ أنا بعدا شايفها فكرة زوينة تقدر تثير انتباه الرأي العام الألماني وووسائل الإعلام الألمانية ويمكن حتى بعض المنظمات الحقوقية فألمانيا وعلاش لا حتى سياسيين ألمان لي يقدرو يسائلو وزيرة الداخلية الألمانية رسميا فالبرلمان ويحرجوها، حسن كااااع من داك التبرهيش لي كديرو فتويتر لي مامسوق ليه حد ههههه. ولا لا؟؟
الإرهابي حاجب مايقدرش يدير هادشي، ماشي غير حيت مافيهش حس الرجلة والشجاعة باش يديرهم، وإنما حيت عااااارف مزيان بلي المعركة الإعلامية مع السلطات الألمانية لي كيحاول يبتزها اليوم، هي معركة خااااسرة. وعااارف مزيييااان بلي الأجهزة الألمانية لي كانت كتلعب بيه ومسخرة الإعلام لي محكمة فيه باش يهضر عليه شوية نهار كان كيهاجم المغرب، هو نفس الإعلام لي تقدر تسخرو ديك الأجهزة باش تسرب ليه معطيات سرية لي ما تقدرش تكشفهم أمام القضاء وغادي تفضحو وتفرش ليه كولشي فحالة ما إذا فكر أنه يخوض معركة إعلامية ضد السلطات الألمانية أو يحاول يرجع راسو قضية رأي عام فألمانيا.
حيت في حدود مهاجمة المغرب وتحميل المسوؤلية للسلطات الأمنية المغربية أو حتى للسلطات الأمنية الألمانية، ولكن داخل أروقة القضاء وبعيدا عن الإعلام، ألمانيا متسامحة مع هادشي ومخليا هاد الإرهابي يجري طوالو، تحت شعار دولة الحق والقانون واستقلالية القضاء وكتقول ليه، بغيتي حقك؟؟ بغيتي تدعيني؟؟ أنا رحلتك تعسفيا للمغرب؟؟ أنا تسببت ليك فالتعذيب فالمغرب؟؟ واخا، أجي يا وليدي للقضاء وإذا بغيتي تعويضات بيناتنا المحاكم، حنا ما عندناش داكشي ديال تخرج تهلل فاليوتوب وتلوح علينا فالاتهامات بدون دليل، وجري طوالك والزمان طويل. إذا لحكتي وذنك عظها.
هكذا تتعامل اليوم ألمانيا مع الإرهابي محمد حاجب، ويعلم الله كيفاش غادي تولي تتعامل معاه منبعد ما يطلع ليها فراسها أو يغلط شي غلطة لي تجمع ليه فيها حسابو كاااامل.
ولكن من هادشي كاااامل واحد التعليق ديال هاد الإرهابي الشلاهبي على وزيرة الداخلية الألمانية فتويتر صراحة سالااااا معايا ههههه، قاليها وا شوفي بعدا انتهاكات حقوق الإنسان فألمانيا بعدا هاد هضري على قطر ههههههه.
ربي ربي واش من نيتك أحويجيب؟؟ ههههه دابا ألمانيا ولات فيها انتهاكات حقوق الإنسان فوق ترابها ؟؟ سبحااااان مبدل الأحوال ههههه.
واخا اسيدي، حتى هذا نظر، ياك نتا مواطن ألماني؟ القانون الألماني يحميك والدستور كذلك؟ وكنتي قلتي بلي نتا صحافي وما تمارسه على اليوتوب هو صحافة وبلي القانون الألماني فداك الإطار يحميك ويأطرك ياك؟؟ ممكن يا وليدي يا حويجيب بصفتك مواطنا ألمانيا وصحفي من الفوق ومن واجب ما تمليه عليك هذه المهنة الشريفة وما تمليه عليك الجنسية الألمانية من واجباتك تجاه وطنك "ألمانيا"، ممكن دير فيديوهات تكشف لينا فيه هاد الانتهاكات ديال حقوق الإنسان لي كاينة فألمانيا وتنور بها الرأي العام الألماني؟؟؟
نتحداااااك ديرها، غير بالعربية اسيدي إذا ما قدرتيش ديرها بالألمانية، أتحدااااك هههههه.... البعابع لي غادي دير يا وليدي هههههه.
ترقبوا من عند بوغطاط المغربي مفاجآت نااارية قريبة على هاد الإرهابي الشلاهبي وباقي رباعة المرتزقة... داكشي النااار فلاكااار، بقاو علقرص !!!!