فماتش صعيب بسبب التيران الخايب.. الوداد رجعو من غينيا بالتعادل مع هافيا والحسم فالروتور بالمغرب

تعادل الوداد الرياضي مع هافيا كوناكري الغيني، اليوم الاحد فغينيا، برسم ذهاب دور 32 من عصبة أبطال إفريقيا، فماتش ما كانش ساهل للفريق الأحمر.
وسالا الماتش بين الوداد الرياضي وهافيا كوناكري اللي تلعب فتيران الجنرال لاسانا كونطي فكوناكري، (سالا) بالتعادل الإيجابي واحد لواحد بين الفريقين، وماركاو الواك هدف التقدم بواسطة القناص جونيور صامبو فالدقيقة 9، وحاولو بعدها هافيا يماركيو التعادل وهادشي اللي نجحو فيه فالدقيقة الأخيرة من الشوط الأول، برأسية للاعبهم كامارا.
وفالشوط الثاني ضغط الفريق الغيني بزاف على مرمى الوداد الرياضي وضيعو محاولات صدها الكول يوسف المطيع ودفاع الواك وحتى البوطو، فالوقت اللي كانوا الوداد كيديرو ليكونطر أطاك، وحتى هما زكلو وما عاونهومش التيران اللي كان مكرفص، والبولوز ديالو حالتو وفيه الغيس، وهذا الشي كاين يقدر يتسبب فإصابات للوداديين بالاضافة للتدخلات الخشنة ديال لاعبين هافيا.
والتعادل ديالو الوداد الرياضي مع هافيا كوناكري فغينيا، كيبقى نتيجة مزيانة للواك بالنظر لظروف الماتش والتيران اللي حالتو، في انتظار ماتش الاياب بالمغرب يوم 30 شتنبر، والفريق الاحمر مطالب انه على الاقل يتعادل فيه زيرو لزيرو باش يتأهل بحكم امتياز التعادل واحد لواحد فالألي، ولكن الوداد غيدخلو باش يربحو ويضمنو التأهل لدور المجموعات بلاما يتسناو شي مفاجأة من الغينيين.