من قلب مسيرة الاسلاميين لدعم حماس. التطبيع خيانة وصهيون يطلع برا. كيفاش العدل والاحسان حول مسيرة الرباط ضد الدولة وحول القضية بيع وشرا كيف هادوك دياولو اللي كيبيعو راية صغيورة ب15 درهم وربحو بزاف اليوم

مسيرة داعمة لحماس. داعمة لما اقترفته ضد اسرائيل قبل اسبوع واللي خلف اكثر من 1300 قتيل. داعمة لكتائب الاقصى. غير داعمة للسلطة الفلسطينية اللي كاينة فالضفة الغربية. ضد ما تتعرض له غزة من قصف من قبل اسرائيل واللي خلف اكثر من 3 الاف قتيل فيهم كثر من 700 طفل.
هاد المسيرة التضامنية مع العمل الداعشي لحماس "طوفان الاقصى" بدات ساعة قبل وقتها اليوم الاحد 15 اكتوبر 2023 من باب الاحد فالرباط وعرفات انزال مكثف من اتباع العدل والاحسان وبقايا البي جي دي مردردين بشي وحدين من التيار القومي العروبي.
مسيرة كانت الداخلية حتى البارح مانعاها وصبحات اليوم سامحة ليها، شدات من قبل باب الاحد وغادية تسالي كيف جميع المسيرات بشارع النصر.
مسيرة فيها شعارات كثيرة ضد التطبيع. ضد علاقات المغرب مع اسرائيل. صحاب العدل والاحسان اللي قسمو المسيرة بين النساء والرجال، فصورة للمجتمع اللي باغينو، رددو باللي "فلسطين امانة والتطبيع خيانة". غوتو وعاودو "لا لا ثم لا والتطبيع خيانة". اعتابرو ان المغرب "ارضي حرة" وباللي خاص "صهيون يطلع برا".
طالبو المناضلين بالنضال "ناضل يا مناضل ضد التطبيع"
ووصفو الحكام العرب من المحيط للخليج بحكام الهزيمة وبغاوهم "يعطيو للشعب الكلمة". طبعا فاشارة للانتخابات. هاد الاسلاميين كذابين. راه تعطات للشعب الكلمة فاكثر من دولة ورفضهم الشعب كيف وقع فالمغرب فانتخابات 2021
طبعا الدولة شافت ياللي رابحة اكثر من تسمح لهاد الاصوات تخرج اللي فيها فهاد المسيرة. الدولة المغربية يستحيل توقف التطبيع. راه اتفاق ثلاثي بين امريكا واسرائيل والمغرب. فيه علاقات ومحورو. التطبيع مقابل اعتراف امريكا بمغربية الصحرا.
الدولة خلاتهم. عارفة ان فلسطين بالنسبة اللي جا اليوم من اطياف سياسية ماشي مواطنين، سلعة كبيعو ويشريو بيها. هي سباب وجودهم گاع. اللي كيلخص هاد الشي هو شي وحدين منهم جابو وايات غزة وكوفيات للمشاركين. هاد التجار ديال الجماعة واشباهها كانو يرددو "من اجل فلسطين نضامنو جميع" "من اجل غزة من اجل فلسطين". هاد الشي باش يبيع راية صغيورة موحالش فايتة جوج دراهم ب15 درهم. باش يبيع كوفية ب30 درهم ويقدر يشريها باقل من 10 دراهم.
فالاخير كلشي بيع وشرا. الاسلاميون رجعو القضية تجارة. الدولة دارت صفقة وربحات والضحية الشعب الفلسطيني اللي رهينة لاهواء حماس وقطر وايران وامريكا وداخل فلعبة إسرائيل والغرب .