صن داونز وصلو لجنوب إفريقيا وبداو كيوجدو للوداد

وصلو ماميلودي صن داونز الجنوب إفريقي لبلادهم، وبداو كيوجدو لإياب فينال السوبر ليك الإفريقي، اللي غيلعبو فيه ضد الوداد الرياضي الاحد الجاي فتيرانهم فبريطوريا.
وبعدما رجعت بعثة ماميلودي صن داونز لبلادها، دار الفريق الجنوب إفريقي اليوم الثلاثاء أول حصة تدريبية فبريطوريا، وخصصها المدرب ماكوينا لرفع لافريشور فيزيك ديال الفريق ويحيد منهم عيا السفر، دارها لهم فلاصال.
الفريق الجنوب إفريقي كيخدم بطريقة مختلفة بزاف على باقي الفرق الإفريقية ومتطورة بزاف عليهم، وملي سالا الماتش ديال الألي الاحد الماضي أمام الوداد فستاد دونور، بداو اللاعبين ديالو مباشرة كيديرو فحصة تدريبية فالتيران باش يحيدو عيا الماتش قبل ما يشدو الطريق لبلادهم.
ومن خلال الاستعدادات ديال ماميلودي صن داونز كيبان أن ماتش الروتور بينهم وبين الوداد الرياضي ما غيكونش ساهل، وغيكون فيه مستوى كبير بحال ماتش الذهاب اللي سالا لمصلحة الواك بنتيجة 2 لواحد، وكل فريق غيبغي يدير نتيجة تخليه يربح اللقب.