ما كاينة راحة حتى يربحو لاكوب: الوداد بداو كيوجدو لروتور الفينال ضد صن داونز وجبران حاضر مع الكروب واخا ما لاعبش (تصاور)

بداو الوداد الرياضي كيوجدو من دابا لإياب فينال السوبر ليك الإفريقي ضد ماميلودي صن داونز الجنوب إفريقي اللي غيتلعب الاحد الجاي فبريطوريا فجنوب إفريقيا.
وجاو لاعبين الوداد الرياضي صباح اليوم الاثنين لتيران بنجلون فكازا، باش يديرو أول حصة تدريبية بعد ماتش الذهاب ديال البارح ضد صن داونز واللي سالا بجوج لواحد لمصلحة الفريق الأحمر.
وعرفت تداريب الوداد الرياضي حضور جميع اللاعبين باستثناء منتصر الحتيمي اللي غيدير اليوم فحوصات بالأشعة باش يعرفو شنو عندو بعد الإصابة اللي كلاها البارح فالماتش.
خلال الحصة التدريبة خدم المدرب عادل رمزي مع اللاعبين باش يحيد منهم عيا ماتش البارح، ويرجع ليهم لافريشور فيزيك، وكانت الأجواء زوينة وحماسية، وحتى جبران اللي ما لاعبش الروتور بسبب التوقيف كان كيتدرب مع الكروب.