مدرب صن داونز: غنتقاتلو فماتش الروتور مع الوداد باش نربحو السوبر ليك وغنموتو معهم على قبل لاكوب

كيبان أن ماتش روتور فينال السوبر ليك الإفريقي فجنوب إفريقيا الاحد الجاي بين الوداد الرياضي وماميلودي صن داونز ما غيكونش ساهل، حيث كيفما الواك باغيين يهديو لكورة المغربية أول لقب من أول نسخة فالمسابقة، حتى الجنوب إفريقيين باغيين حققو نفس الإنجاز.
مدرب ماميلودي صن داونز الجنوب إفريقي رولاني موكوينا، أكد أن الفريق ديالو غيتقاتل فالفينال ضد الوداد الرياضي على قبل السوبر ليك الإفريقي، وقال فتصريح نشرو الاتحاد الإفريقي لكرة القدم اليوم الثلاثاء: "غنديرو كل ما فالجهد ديالنا باش نكونو أبطال فنهاية اليوم، ماتش الذهاب سالا ودابا جاي الروتور وغنحطو الثقل ديالنا كامل على الوداد".
مدرب صن داونز معول على الدعم ديال جمهورهم فالماتش د الروتور ضد الوداد الرياضي، وأكد أن مساندة أنصارهم فبريطوريا غيكون لها دور كبير فتجاوز خسارة الذهاب أمام الفريق الأحمر فستاد دونور بنتيجة 2 لواحد وتقلبها للمصلحة ديالهم مع نهاية ماتش الروتور.