فاجتماع دلجنة العدل والتشريع وحقوق الإنسان بمجلس النواب.. برلمانية من البي جي دي لبرلماني من الأحرار: ما تكميش فالبرلمان راه ممنوع.. وهو رد عليها بكل تخلف: أش كديري هنا مع الثمنية دالليل

نهار الخميس، وعلى هامش اجتماع لجنة العدل والتشريع وحقوق الإنسان بمجلس النواب، وقع واحد النقاش غريب بين برلمانية من المجموعة النيابية للعدالة والتنمية وبرلماني من فريق التجمع الوطني للأحرار.
وسبب هاد النقاش الساخن لي تحول إلى تبادل ملاحظات بين الطرفين، وفق ما أكد مصدر "كود"، بحيث أن البرلماني ديال طرفاية قال لواحد البرلماني صديق ديالو أنا غادي نخرج حدا الباب نكمي شي كارو ونرجع، وما جا يكمل كلامو، حتى قالت ليه برلمانية من البي جي دي": "ما خاصكش تكمي، راه التدخين ممنوع، خاصك تحتارم القانون الداخلي لمجلس النواب، ويلا بغيتي تكمي خرج برا خارج المجلس.
الملاحظة ديال هاد البرلمانية، ما تقبلهاش البرلماني، ورد عليها حتى هو، وفق مصدر "كود"، بطريقة متخلفة بزاف انتي بعدا أش باقية تديري هنا مع الثمنية ديال الليل.
هاد الرد فيه احتقار للمرأة وتخلف كبير.
وكادت الأمور غتطور كثر، لولا انصراف البرلماني إلى إشعال سيجارته غير مهتم بملاحظة البرلمانية ولا لردو المتخلف بزاف بزاف.