هاد الحملة ديال التخوين دكل من هو غير مقاطع وغير متعاطف راه خطيرة وغادا وكتحول من عنف رمزي يمارس في مواقع التواصل لعنف على أرض الواقع كيتمارس في حق المواطنين، وزايدون هاد ماكدونالد الى كان كيدعم إسرائيل فراه كيدعمها ديما حتى من قبل الحرب

المقاطعة هي أسمى فعل احتجاجي باقي يقدر يمارسوا المواطن في سلام وهدوء ومعندو حتى شي خطر على سلامتو الجسدية والصحية، وطبعا المقاطعة خيار فردي كيتمارس جماعة في بعض الأحيان، شحال من واحد فينا مقاطع منتجات او محلات او أشخاص بشكل فردي، كاين لي مقاطع مول الحانوت لي تحت دارهم وكيتسخر من واحد آخر بعد، كاين لي مقاطع قهوة وأعلن مقاطعته لها بمنشورات في فايسبوك او تعليق في گوگل، كاين لي مقاطع نسابوا أو واليديه أو عائلتو، ضروري ماتلقى أي مغربي مقاطع شي خالتو حيت فيها قوة الهدرة ولانكوات، ولكن فاش كيقاطع المغربي مثلا خالتو او قهوة او مول الحانوت مكيمشيش يبقى يدور على العائلة واحد واحد ويحضيهم واش مقاطعين خالتو حتى هوما، او يوقف قبالت القهوة لي مقاطع ويبدى على الكليان ديالها بالسبان.
ولكن للأسف هادشي لي كيوقع فاش كيقاطعو المغاربة شي حاجة بإيعاز من مواقع التواصل وكيتحمسوا في المقاطعة، بحال لي وقع مع افريقيا وسيدي علي حتى ولينا كنشوفو بنادم كيتسب حيت شارب سيدي علي، هادشي عاود رجع هاد الأيام مع حملة المقاطعة نصرة لصحاب غزة، وشفنا مرة معربطة وكتسب في طفلات كيستمتعوا بوجبة ديالهم في ماكدونالد طنجة أي في مدام بورط سابقا، هنا كنوليو في ديكتاتورية والشوفينية حيت انا مقاطع خاص كولشي يقاطع وهادي مهمة سامية هاص نفرضوها على كولشي، ايوا فيناهو الفرق بين هادو وداعش لي باغا تفرض نسخة موحدة ومتطرفة من الإسلام على كولشي، راه كل واحد عندو القدرة على التميير والتموقف بلا مايفوض عليه شي واحد شي حاجة.
أنا مثلا من نهار عقلت وانا مقاطع ماكدونالد مميعجبنيش أولا وحيت ماشي صحي، ومقاطع كاع مطاعم الفاست فود وكندعم أي دعوة لمقاطعتهم، ولكن عمري ماغادي نمشي نعربط وسط منو ونحاول نقنع بالقوة الناس لي كتاكل فيه، هنا خاص الدولة تتدخل تحمي المستثمرين فيها واخا راه ماكدو مكيفيد البلاد بحتى لعبة كيستافد هو كثر ، عبد المالك مول بيصارة مفيد للدولة والشعب كثر، غاهو هاد الحملة ديال التخوين دكل من هو غير مقاطع وغير متعاطف راه خطيرة وغادا وكتحول من عنف رمزي يمارس في مواقع التواصل لعنف على أرض الواقع كيتمارس في حق المواطنين، وزايدون هاد ماكدونالد الى كان كيدعم إسرائيل فراه كيدعمها ديما حتى من قبل الحرب، والى توقفات الخرب في غزة حاليا شنو غادي توقف المقاطعة وغير يرجع ماكدو يدعم إسرائيل على خاطرو ولا كيفاش، وفي الصيف ماتلقاش فيه بلاصتك بحال الى صافي بنهاية الحرب تسالات معاناة الفلسطنيين وهانية داك الساعة ماكدو كيلذاذ خصوصا في الصيف ماتلقاش بلاصتك فيه، آش هاد المنطق ديال والو.