من المآسي للي عاشتها بلادنا ف2023.. "زلزال الحوز" اللي دمّر عدد من المناطق وبانو فيه المغاربة متحدين والتدخل ديال سيدنا كان حاسم فتقديم مختلف أشكال الدعم للضحايا (تصاور)

omarelmouzaine@gmail.com
عدد من المآسي وقعات فبلادنا عام 2023 وتنوع كل حادث على حدة لكن أكبر هاد المآسي اللي قلبات كولشي هو "زلزال الحوز" اللي غطى على كاع الأحداث وغادي يبقى في أذهان جميع المغاربة والأجيال الجاية.
فتاريخ 8 سبتمبر من 2023 تسجل زلزال بقوة 6.8 درجة على مقياس ريشتر وجا تقريبا مع داك الساعة 23.11 دقيقة فمنطقة الحوز بجهة مراكش آسفي، وتحدد مكان هاد الزلزال حدا جماعة "إغيل".
مباشرة مللي وقع الزلزال بداو لمغاربة يسمعو الموت على مواقع التواصل الاجتماعي. الداخلية زربات باش تعلن على شنو وقع بالضبط وتدارت خلية مركزية داخل أم الوزارات. هاد الخلية كانت كل ساعة كتخرج بيان تعلن فيه على عدد الموتى والضحايا وشحال اللي تدفو.
آخر بيان خرج من الداخلية كيقول باللي ماتو اكثر من 2900 قتيل وأزيد من 5500 جريح كلهم فالحوز وتارودانت وشيشاوة. الزلزال وقف كولشي. حزن كبير عاشتو بلادنا وبانو فيه المغاربة متحدين من خلال مختلف المساعدات اللي مشات للحوز وباقي المناطق المتضررة.
الدولة نزلات بكل ثقلها للتقليل من الآثار الوخيمة اللي عرفاتها هاد المناطق، وذلك من خلال تقديم مساعدات مالية مستعجلة حددت قيمتها في 2500 درهم شهريا على مدى سنة. هاد المساعدات طبعا جات بتعليمات من الملك محمد السادس اللي دعا فنفس الوقت إلى مواصلة تقديم المساعدات للأسر المتضررة والإسراع بتأهيل وإعادة بناء المناطق المتضررة وتوفير الخدمات الأساسية.
صندوق تدبير آثار زلزال الحوز تدار بالزربة. مساهمات كثيرة جات من مختلف المؤسسات والمنظمات والهيئات. وسيدنا كان تبرع بمليار درهم حسب ما علن عليه مجلس إدارة مجموعة "المدى"، وكان الهدف من هاد المساعدات هو جمع مبادرات التضامن لمواجهة هاد الكارثة الطبيعية اللي عرفاتها بلادنا.
مباشرة بعد وقوع هاد الزلزال المدمر، تجندات مختلف السلطات العمومية (سلطات محلية، أمن وطني، ودرك ملكي، وقوات مساعدة، ووقاية مدنية)، بالإضافة إلى الدعم الكبير اللي قدماتو القوات المسلحة الملكية للضحايا من خلال تسخير مختلف الإمكانات البشرية واللوجستية لإنقاذ الضحايا.