الاستقلال تاهو تابعينو الفضايح..كلف واحد متابع فالمحاكم ومهدد بالعزل من البرلمان باش يدير تقييم المخطط الأخضر وتراجع عليه بسباب تداعيات اسكوبار الصحراء

الفريق الاستقلالي ضربات التلفة، بعدما كلف البرلماني عبد الرزاق أحلوش يترأس اللجنة الموضوعاتية المكلفة بتقييم 14 سنة من المخطط الأخضر في قطاع الفلاحة، تراجع عليه، وبدا كيستعد ينتخب برلماني جديد بلاصتو.
هاد التلفة لي شادا الفريق الاستقلالي، بسباب هاد الحملة ديال الاعتقالات في صفوف سياسيين وبرلمانيين متورطين في ملفات فساد. لذلك تراجع على تكليف أحلوش المهدد بالعزل من البرلمان بعدما تعزل من رئاسة مجلس جماعة السويهلة نواحي مراكش.
الفريق الاستقلالي، حسب مصدر "كود"، دار توجيه لجميع اعضائه بمجلس النواب، باش أي واحد عندو شي ملف فالمحاكم ميبقاش يبان فالواجهة ومايعطيش تصريحات وميترأس حتى لجنة.
المسألة واضحة بالنسبة لرئيس الفريق الاستقلالي نور الدين مضيان، حسب مصدر "كود"، فإنه كيشوف بلي خاص تكون توجيهات داخل كل حزب من الناحية الاخلاقية فقط باش يمنعو البرلمانيين المتابعين فملفات الفساد مياخدوش الكلمة وسط البرلمان ولا يترأسو اللجنة ولا أي مهمة، فقط توجيهات ماشي تكون فالنظام الداخلية لأن "منع البرلمانيين غير دستوري حتى يقول القضاء كلمته الأخيرة".
يشار بلي المحكمة الإدارية بمراكش عزل رئيس جماعة السويهلة ضواحي مدينة مراكش، البرلماني عبد الرزاق أحلوش، بعدما طالب والي جهة مراكش آسفي، كريم قسي لحلو، بتفعيل مسطرة العزل في حقه.