ايسكوبار افريقيا. بيان الوكيل العام جا معطل. واش غاديين يبداو ب"جون افريك" ويساليو بهادوك اللي كيديرو فيديوات وكيقولو عندنا المحاضر

بيان الوكيل العام للملك لدى محكمة الاستئناف بالدار البيضاء جا معطل فقضية "ايسبكوبار افريقيا". اه تعطل وبزاف فاللول باش يهدر مع الرأي العام وتسنى حتى التقديم عندو واحالة 21 منهم على قاضي التحقيق. ما تگولوش سرية التحقيق. باش كيبدا الاستماع باشرافو عند الفرقة الوطنية لخبار خرج وممكن تتواصل هاد المؤسسة مع الرأي العام. سرية التحقيق كانت باش كان الاذن بالمتابعة والتصنت وجمع الادلة والقرائن ماشي مع المواجهات بين المتهمين.
دابا فالمرة الثانية تعطل البيان ديال الوكيل العام. كان خاصو يخرج باش خرجات لائحة فيها وزرا وكبار مسؤولي الداخلية وشخصيات اخرى. هادي راها كتروج هادي مدة. علاش حتى خرجات "جون افريك" البارح 9 يناير 2024 وهدرات ونسبات هاد الهدرة لمصدر امني گاع٬ باش تقول باللي رئيس الفرقة الوطنية للشرطة القضائية مشى لوجدة فاطار نفس التحقيق وباللي كاينة 28 شخصية غادي يستامع ليهم الوكيل العام وباللي كاين فيديوات جنسية فيها شخصيات كبيرة فالجامعة الملكية لكرة القدم وسياسيين. طبعا هاد الشي طلع فايك. ف"كود" نشرناها قبل بيان الوكيل العام. فالسيمانا اللي فاتت خرجنا جوج مقالات باللي ديك اللائحة اللي كتروج كلها "فايك".
لكن كان خاص النيابة العامة تتصدى لهاد الشي قبل. الوكيل العام فهاد البيان قال باللي "سبق أن أعلن بمقتضى بلاغه المؤرخ في 24دجنبر 2023 في إطار الاحترام التام لقرينة البراءة عن الخلاصات الأولية التي اسفر عنها البحث المنجز في هذه القضية وفق المساطر القضائية المقررة قانونا تحت إشراف هذه النيابة العامة وعن عدد الأشخاص المشتبه تورطهم فيها، حيث يجري التحقيق معهم حاليا من طرف السيد قاضي التحقيق بناء على الملتمس الذي تقدمت له به النيابة العامة حول الأفعال المنسوبة لكل واحد منهم". دابا خاص الوكيل العام ما يفتحش تحقيق غير باللي جبد الشخصيات والفيديوات ووو٬ خاصو يفتح تحقيق حتي فنعت الناصري وبيوي ومن معك بالاجرام ويسبهم ليل ونهار. كيفاش هادو مازال حتى قاضي التحقيق ما بداش معاهم التحقيق التفصيلي واللي غادي يبدا نهار 25 من هاد الشهر٬ وكيتسماو مجرمين. كيدينهم قضاء الشارع. هاد الشي راه خطير بزاف.
مزيان تحميل المسؤولية القانونية للي كتب ونشر ودار فيديوات فيها "مزاعم وادعاءات تستهدف نسبة اتهامات لا اساس لها من الصحة للاشخاص و المؤسسات موضوع تلك الاخبار فضلا عن التشهير و المساس بسمعتهم" بحال كيف دارت "جون افريك"٬ ولكن خاص نفس الصرامة مع اللي كيدير فيديوات وكيكتب المقالات فيها ادانة للناصري وبيوي. فيها حسم فالاتهامات. ما كاينش ريجة الشك. كيكتبو بلغة وثوقية باللي مجرمين.
عنداك النيابة العامة تغبر علينا. فاطار سياسيتها التواصلية مزيان اخبار الرأي العام انطلاقا من اليوم وباش يبدا الاستماع لمروجي هاد الاشاعات ومختلقيها٬ يتخبر الرأي العام. بيانات الوكيل العام راها هي الوحيدة اللي قادرة توقف هاد الهستيريا اللي بانت مع "ايسكوبار افريقيا".