ماشي دفاع على الناصري ولكن دفاع علي القانون والحق فالوصول للمعلومة اللي جات فالدستور. گولو لينا اش واقع فقضية ايسكوبار افريقيا

البارح لاربعا 27 شتنبر 2023 دارت صورة لرئيس الوداد سعيد الناصري ورا سيدنا خارجين من جامع. الفكرة اللي بغى يقولها مروج هاد الصورة هو ان رئيس الوداد والقيادي فالبام حضر للحفل الديني اللي دار بمناسبة العيد المولد النبوي. هاد الشي فايك. سيدنا حيى الليلة فالرباط ماشي كازا وهادي صورة قديمة ما عندها علاقة بليلة البارح.
مول الصورة اللي وجدها وخرجها ودار ليها تعليق عينو يغرق رئيس الوداد. يدينو. يلعب دور فقتلو سياسيا او رياضيا. بغى يگول باللي هادا كيتحدى كلشي.
علاش هاد الفيلم؟ حقاش قرينا فصحف ماشي فبيان النيابة العامة باللي كاين تحقيق مع شي ايسكوبار ديال افريقيا سميتو المالي وجبد فيه شخصيات منهم رئيس الوداد ورئيس الجهة الشرقية والمغنية الشهيرة لطيفة رأفت وشخصيات اخرى.
وكيفاش بدا هاد الفيلم المثير الغريب بزاف. بدا بمقال نشراتو صحافية ف"جون افريك". يعني كلشي فيه ان. كلشي مثير للاستغراب. كلشي كيحير. كنعرفو خبارات "جون افريك" واهدافها باش كتكون على المغرب. كنعرفو الجهات اللي كيتقدر تخرجهم.
داز الوقت وقرينا فجورنالات مغربية باللي الفرقة الوطنية للشرطة القضائية استمعات لهاد الشخصيات. الغريب ان النيابة العامة ما خرجات والو. غاديين تقولو لي سرية التحقيق. اش من سرية بقات باش خرجو لخبارات. بلى ما تصطاو علينا.
دابا رئاسة النيابة العامة خاصها تهدر. ما تفشيش السرية وغير تقول راه تفتح تحقيق ووو. راه كلشي عارفو. صمتها راه مساهمة خايبة فادانة شعبية لرئيس الوداد وراه خرق لمبدأ دستوري وهو الحق فالوصول للمعلومة. عافاكم مرة اخرى ما تهدروش لي على سرية التحقيق وكل استماع ليه او لغيرو كيخرج خبارها.
خاص الدفاع على القانون. راه كلشي اللي سمعو ليهم ابرياء ما خاصش ادانة ليهم. باش تعطلو تعلنو على الاجراءات راه مساهمة فهاد القتل الرمزي لرئيس الوداد ولاهم نادي فالبلاد.
ما كاين حتى شي واحد فوق القانون ولكن خاص الشفافية. فلوس النادي راه كاين جموع عامة كتصادق عليها وكاين مؤسسات كتراقبها. راه بلاد هادي. ايلى كان شي حاجة يستحيل يغيب على اجهزتنا. شوفو مثلا غير فالابناك٬ راه اي موظف فالبنكة يقدر يدير تصريح ايلى بان ليه شي كليان حط فلوس كثيرة. هادي راها خلية تابعة لرئاسة الحكومة وكلشي عارفها. هاد الشي بلا ما نهدرو علي اجهزتنا فكاع الميادين
اليوم الضحية لحد الساعة وفغياب اي بيان رسمي من النيابة العامة هي الوداد البيضاوي. الضحية هو رئيس الوداد. هما دوك اللي سميتهم خرجو فالصحف.
هاد الشي فيه مس خطير٬ فغياب اي بيان رسمي من النيابة العامة على القضية٬ لكرة القدم المغربية.
خاصنا نعرفو اليوم اش واقع ماشي غدا. كلشي يطبق عليه القانون ولكن بلا قتل شعبي بلا ادانة شعبية بالقانون. ياك حنا دولة القانون وطبقو القانون ونوضو قولو لينا اش كاين