بنشريفة: البنزرتي مدرب كبير استفدت منو والوداد علموني نحترم توني الفريق اللي خدام فيه وها كيفاش ربحتهم

عبر حمودة بنشريفة المدافع الأسطوري للوداد الرياضي على الشكر ديالو للمدرب التونسي فوزي البنزرتي ولمكونات الواك على كل ما عطاوه له فالكورة، وأكد أن البنزرتي مدرب كبير وتعلم منو بزاف، وأن الواك فريق كبير وتعلم فيه يحترم توني أي فريق يلعب فيه.
وهضر حمودة بنشريفة بعدما قاد شباب السوالم لتحقيق رباح كبير على الوداد الرياضي برسم الدورة 18 من البطولة الاحترافية وصلت النتيجة ديالو لثلاثة لواحد، وقال: "كنشكر فوزي البنزرتي حيث فالباساج ديالي معه 2021، عطاني بزاف ديال الحوايج وعندي له احترام كبير وهو رجل مثقل بالألقاب واستفدت معه بزاف فهاديك 8 شهر اللي دوزتها مساعد له وتبدلت عندي الشوفة لبزاف الحوايج فالكورة وكيفاش توجد الماتش ديالك وكيفاش تقرا الخصم".
وكمل بنشريفة: "الوداد فريق إذا خليتي له المساحات غتخلص الثمن غالي بزاف، وشفنا الماتش ديالهم ضد شباب المحمدية كانت غتكون النتيجة كثر من 5 الأهداف، وكنا عارفين أن الأمور ما غتكونش ساهلة، وخدمنا عليه وحتى الضربات الثابتة من الحلول اللي كانت، الوداد وفاش كنت معهم كنت كنخدم مع اللاعبين عليها، وكنت عارفهم كيفاش كيضربو وما كانتش عندنا مشاكل ضدهم كنشكر اللاعبين ديالنا على المباراة اللي قدمو".
وأكد بنشريفة: "صعيب تلعب ضد الفريق اللي كونك واللي نشأت فيه ولكن كنظن هادي هي كورة القدم، والناس اللي علمونا فالوداد علمونا أنك تكون معقول فينما تكون كتحمل توني الفريق اللي كتخدم معه، وهادي هي الكورة وقبل الماتش هديت الورد لجمهور الوداد ودخلت سلمت على لاعبين الواك فالفيستيير وعلى المسؤولين وبحالا جاي لداري وهادي هي كرة القدم".