واش كيهضر على براهيم دياز؟ الركراكي: اللي بغا يجي يلعب مرحبا واللي ما بغاش ماشي مشكل.. وانا ما نادمش على اللي ما عيطش عليه وما كاينش شي لعاب كون كان معنا كان غيريحنا لاكوب

هضر الناخب الوطني وليد الركراكي على الجولات اللي كيدير خارج المغرب باش يشوف اللاعبين اللي ممكن يعيط لهم يلعبو مع المنتخب المغربي، وقال ان حتى واحد ما كيعرف وقتاش كيسافر، وقال بلي اللي باغي يجي يلعب مع المنتخب المغربي مربحا به واللي ما جاش هانيا وما كاينش مشكل، وهذا الشي كيجي مع الهضرة اللي دايرة حول إبراهيم دياز نجم ريال مدريد الإسباني، والمنافسة على الخدمات ديالو بين المغرب وإسبانيا وانه غيعيطو عليه بجوج فشهر مارس الجاي.
الناخب الوطني وليد الركراكي دار حوار مع قناة الرياضية، وقال فيه: "كاينين شي لاعبين اللي كنهضرو معهم مدة هادي واش غيجيو او ما غيجيوش، وغنعاودها اللي غيجي مرحبا واللي ما غيجيش ماشي مشكل".
واضاف الركراكي: "ملي كنسافر ونمشي نشوف شي لاعب حتى واحد ما كيعرفعا، ومالين الدار مرة مرة كنقولهم غادي هنا وراني غادي الهيه، وبطبيعة الحال فنسافر باش نشوف لاعبين اللي نديرو معهم البلان ديال هاد كوب دافريك وعلى اللي جاي ونزيدو القدام، وفمارس غتشوفو شكون غيكون معنا".
واكد الركراكي، انه ما نادمش على اللاعبين اللي اختارهم يشاركو فكاس افريقيا فالكوت ديفوار، وانه ما نادمش على شي لاعب ما عيطش له يشارك، واكد ان باب المنتخب المغربي مفتوح وممكن عيط على اي لاعب.
وردا على سؤال واش نادم على شي لاعب ما ديتيهش قال الركراكي: "أنا ما كندخلش فهادشي، وما كندمش وملي كنهز واخد لگروب كنكون مؤمن به وملي كنخسر كنتحمل المسؤولية".
وكمل وليد الركراكي: "ما كاينش شي لعاب كون كان معنا كنا غنديو كوب دافريك، واللاعبين اللي اختاريت هما اللي كان خاصني نديهم، واذا درت شي غلط غتشوفو فالمعسكر الجاي اللاعبين واش غيجيو ولا ما غيجيوش ولكن المشكل ديالنا حنا هو ملي ما كتكونش الامور مزيانة كنقلبو كون كان فلان كون x.. كنشوفو للقدام واللي يستاهل غيكون معنا، كلشي مفتوح واللي غيستاهل غيكون".
وغيلعب المنتخب المغربي 2 ماتشات وديين فمارس الجاي، مع جوج منتخبات من افريقيا، باش يوجد لكان "موروكو 2025".
وقال الركراكي: "مازال ما اختارينا المنتخبات اللي غنلعبو ضدها ماتشات أميكو، ولكن غيكونو ضد 2 منتخبات افريقية، غنلعبو فالمغرب وخاصنا نوجدو ونولفو، وغنختارو جوج منتخبات فالمستوى".