الصگع جابها فراسو ويمكن ما عمرو يحط رجلو فالسعودية. قيادي العدل الونخاري هان وصور البعثة الديبلوماسية السعودية وحگر بوليسي مغربي. مصدر ل"كود": طبق فيه القانون باشراف النيابة العامة

البارح لاربعا 21 فبراير 2024 ٬ خرجات "العدل والاحسان" بيان كتهدر فيه على اعتقال بوبكر الونخاري٬ عضو الأمانة العامة للدائرة السياسية للجماعة المحظورة "من أمام سفارة المملكة العربية السعودية بالرباط". الجماعة ما قالت والو من غير "ذهب للاستفسار عن سبب رفض تمكينه من تأشيرة أداء مناسك العمرة، فإذا به يقتاد إلى مقر الدائرة الأمنية بالسويسي دون معرفة الأسباب".
الفيلم بان ما شادش. اولا باش كترفض ليك فيزا فاي بلاد ممنوع ترجع لهاديك لبلاد. سير فحالك. تصورو هاد الدكتور اللي عزيزة على العدليين٬ يمشي لامريكا او شي دولة اوربية٬ يرفضو ليه الفيزا٬ واش يقدر يرجع عندهم يحتج. شوفو الغباء فين كاين. راه حتى تاخد الفيزا وتوصل عند الدولة اللي عطاتها ليك٬ ممكن ترفض ديك الدولة تدخل عندها. يجربو عليك من المطار. ما علينا.
واش بصاح رواية الجماعة صحيحة؟
حسب مصادر قضائية ل"كود" اللي وقع هو ان هاد المواطن كيخضع للبحث حقاش هان و"خرق قواعد الحماية المخصصة للبعثات الدبلوماسية".
واكدات مصادر "كود" باللي "تم الاحتفاظ به تحت تدبير الحراسة النظرية" لان "البحث القضائي" اللي امرات بفتحو النيابة العامة المختصة" فرضو.
لكن اش دار بالضبط؟ وفق مصادر "كود" السيد دخل باش يسول على الرفض وباش كان كيهدر معاه مسؤول بالسفارة السعودية٬ جبد تلفونو وبدا يصور المقر الديبلوماسي. هادا راه مخالفة باش يعرفوها لمغاربة مزيان. داخلة ف"مخالفة إجراءات الأمن والسلامة الخاصة بالسفارات والقنصليات والتمثيليات الأجنبية المعتمدة بالمغرب".
الفيلم ما سالاش هنا. باش بوليسي دخل هانو ودار فيه. هنا راه جوج تهم" رفض الامتثال" و"اهانة" رجل امن.
دابا راه وفق مصادر "كود" غيتعرض "على النيابة العامة بالرباط بعد انتهاء إجراءات البحث القضائي" قبل ما تسالي مدة حراستو النظرية"
الصگع مشات ليه العمرة وبهاد التصرف ما عمرو يدخل للسعودية وغادي يتحاكم بسباب ديك الصور وديك الاهانة لرجل الامن.