واش بصاح الامارات ضربات بنعرفة؟ مصدر ل"كود": لا علاقة لدولة الامارات بالهجوم رئيس الحكومة ولا على المغرب واللي داروها مرتزقة اللي عطاهم يخدمو منو وممكن يكونو اللي خدمو مع الامارات فالسابق هما ورا هاد الشي

الحملة اللي استهدفات رئيس الحكومة ديالنا كيف قالو ناسو فتويتر واش دارتها الامارات العربية المتحدة. مصدر ل"كود" نفى ذلك "كيفاش ممكن تتصورو ان دولة الامارات ممكن دير هاد الشي للمغرب. الخلافات كاينة ولكن ما يمكنش توصل لهاد التدوينات اللي خرجات".
حسابات فيها ان المغرب "يمر باسوأ مرحلة في تاريخ المملكة بعد الانتشار المخيف لفيروس كورونا وعدم ادراك الحكومة للموقف الخطير" ثم "العثماني تسبب احراج الملك وقد يكون هو الاصعب بعد عدم توفر المؤنوالغذاء للشعب وانتشار الفوضى" و"المغرب على وشك الدخول في خانة المجاعة بسبب اهمال الحكومة وضعفها في ادارة البلاد" "حكومة العثماني تهتم بتمويل الجماعات الاخوانية في المملكة وتهمل شعبها في ظل الازمة الكبيرة التي يمر بها المغرب" وعدد كبير من هاد التويتات تنشرات من شي 10 حساب فنهار واحد.
هاد الشي وفق مصدر "كود" ممكن يكون حرب لوحدين ووحدات من المغرب وخارجو خدمو مع الامارات ودافعو عليهم وربحو منهم لملايير وباش سدات عليهم حركو جيوشهم. مصدر اخر ل"كود" قال باللي هاد الشي ماشي مكلف بزاف ممكن بشي الف دولار وما عندو علاقة بدولة الامارات. اييه خارج من مصر ولكن هادو راهم جيش مرتزقة اللي عطاه يخدم معاه.
مصدر "كود" قال باللي العلاقات المغربية الاماراتية ماشي سيئة وباللي مشاكلها كيف ما كانت ما عمرها توصل لهاد الدرجة. اييه عند الامارات رفض للاخوان ولكن راهم عارفين المغرب مزيان. راهم ترباو هنا.
المصدر قال ل"كود" شوفو غير المستفيذ من هاد الحملة باش تعرفو شكون وراها ولا اش بغات تتحقق هاد الجهة. اعلام محور تركيا قطر كلها اهتمات بيها بطريقة غريبة جدا وحتى الاعلام اللي تابع ليهم فالمغرب واللي كيمولوه بشكل من الاشكال دافع عليهم وطبعا حزب العدالة والتنمية اللي بان ما عندو علاقة بادارة ازمة كورونا ورئيس حكومتو ما عارف والو٬ استغل هاد الشي باش يرفع شعبيتو.
دابا واش شي دولة عندها حتى الوقت تديرها فشي حاجة اخرى خارج مشاكلها مع كورونا. اليوم راه امارة دبي دارت اجراءات تقشفية ما عمرها كانت. باقي غير هاد الامارات تفكر وتشن حرب ضد نكرة بحال العثماني وفهاد الوقت. هاد الشي كولو ما شادش يشرح مصدر "كود".
دابا هاد التافهين ديال الخليج لا قطر لا امارات ومعاهم حتى تركيا يقودو يبعدو منا. ذبابهم خدام هنا مزيان وصراعهم بغاو ينقلوه لينا. فهاد الشي اللي وقع مع بنعرفة غير عينة.
هادوك الوسطا اللي دارو لفلوس مع هاد الجهة او الجهة لخرى تقدر تكون هي وراء هاد الشي. راه بحال ديك الحملة تقدر تطلع غير ل5 الاف دولار ولا غلات بزاف بزاف بزاف توصل ل8 الاف دولار" يقول خبير ل"كود" عندو معرفة بهاد الشي.
من هاد الشي كولو خاصنا نعرفو شكون لعب هاد اللعبة. ماشي الاسلاميين لا القطريين ولا الاتراك اللي غاديين يقولو لينا هاد الشي. الدولة ديالنا هي اللي كنصدقوها. اكيد دايرة تحقيق وغادي ياخد الوقت باش نعرفو فالاخير مول هاد الفعلة