عشنا وشفنا الداخلية ديالنا كدافع على الديموقراطية. ياك نفس الداخلية اللي كانت تزاوك وتبوس يدين المتطرف الاخر المغراوي باش يساندها فدستور 2011 وخرجاتو للشارع كاع =فيديو

قال سلطات مراكش في تعليلها لرفض ترشح السلفي حماد القباج وكيلا للائحة العدالة والتنمية بكليز بمراكش ":"تبين من خلال البحث الإداري في شأن ملف الترشيح .. أن المعني بالأمر عبر في مناسبات علنية عن مواقف مناهضة للمبادئ الأساسية للديمقراطية، التي يقرها دستور المملكة، من خلال إشاعة أفكار متطرفة تحرض على التمييز والكراهية وبث الحقد والتفرقة والعنف في أوساط مكونات المجتمع المغربي".
طبعا هادي ما كاينة حتى فشي قانون. القباج عندو افكار متطرفة عندو خلط بين اليهودي والصهيوني عندو عيوب كثيرة ولكن هاد التبرير راه ما شادش. راه ماشي قانوني ومخالف للدستور تمنح حد من الترشح لانه عندو مواقف من الديموقراطية او لانه يشيع افكار متطرفة تحرض على التمييز والكراهية والحقد والتفرقة والعنف" ايلى كان بحال هاكا وعندو هاد الشي راه خاصو يتحاكم.
راه باينة الشروط اللي ما كتخليش شي حد يترشح وهي بدون سوابق عدلية وما عندوش لوسخ وعندو 23 سنة بالاضافة الي شروط اخرى / شوفوها فهاد المقال /
دابا المشكلة لكبيرة ان الداخلية لجئات للمغراوي ديال دار القرآن فمراكش والمعروف بولائه للسعودية وكان انذاك حماد القباج ناطق رسمي باسم الجماعة٬ باش يدعم دستور 2011. المغراوي ف2011 دافع وشوفو الفيديو اللي دارتو كود وكيكول فيه التسجيل فاللوائح الانتخابية ضروري وواجب وخاص التصويت على الدستور. طبعا ما بقاش يكون التصويت بنعم واخا راه باينة من السما كيعاود الخبير ديال مواقف للاسلام وووو وجا فالاخير وقال "ارجو الله ان لا يحوجنا كي نكون من المخالفين".
من بعد معروف ان القباج ما بقاش مع المغراوي وقسماتهم سوريا واليمن وبعد منو وصحاب العدالة والتنمية كيكولو راه راجع افكارو واخا مازال شي تدوينات فتويتر دياولو فيهم التطرف والعنف.
دابا واش الداخلية ديالنا بصاح كدافع على الديموقراطية اللي مازال ما وصلناش ليها؟ هذا مجرد سؤال