ليفار ضربو التواركة بهاتريك ديال زحزوح اللي دار الفرق ورجعو للصدارة والحسنية ربحو المحمدية وشاعلة على البقاء

رجع فريق الجيش الملكي لصدارة البطولة الاحترافية لكرة القدم، من بعدما ربح اليوم الاحد فريق اتحاد التواركة فديربي الرباط اللي تلعب فتيران القنيطرة، برسم الدورة 21.
وسالا الماتش بين الجيش الملكي واتحاد التواركة بنتيجة 3 لزيرو، وتسناو ليفار الشوط الثاني باش يماركيو بعدما استغلو طرد لاعب اتحاد التواركة امادي كاديو، وقدر البديل امين زحزوح يضرب هاتريك للفريق العسكري فالدقيقة 63 و69 و76.
وبهذه النتيجة خداو الجيش الملكي 3 بوان خلاتهم يرجعو لصدارة البطولة الاحترافية برصيد 46 نقطة، على بعد 2 نقاط من الرجاء الرياضي اللي رجعو للمركز الثاني، وليفار مازال عندهم ماتش مؤجل ضد نهضة بركان، أما اتحاد التواركة بعد هذه الخسارة بقات عندهم 26 نقطة وكيحتلو المركز السابع.
وعن نفس الدورة ربح فريق حسنية أكادير شباب المحمدية اليوم الاحد فأكادير، بنتيجة 2 لزيرو، وطلعو للمركز 10 برصيد 23 نقطة، أما شباب المحمدية بقات عندهم 22 نقطة وكيحتلو المركز 12 والفراقي بجوج كيعانيو فأسفل الترتيب اللي شاعل فيه الصراع على البقاء.