الركراكي انتاقم من حاريث اللي داير موسم واعر بسباب هاد التصريح

علامات استفهام كثيرة مرة اخرة صاحبت إعلان الناخب الوطني وليد الركراكي على لائحة المنتخب الوطني المغربي لكرة القدم، وهذه المرة حيث ما عيطش لنجم أولمبيك مارسليا الفرنسي أمين حارث اللي مقدم مستويات واعرة مع الفريق ديالو.
وليد الركراكي عيط على 24 لاعب استعدادا لمواجهة كل من من أنگولا وموريتانيا وديا يوم 22 و 24 من هاد مارس فأكادير، وعرفت اللائحة تواجد أسماء جديدة بحال إبراهيم دياز نجم ريال مدريد وغياب أسماء اخرى اللي تراجع مستواها بحال نصير مزواري ورومان سايس وغيرهم، ولكن الغريب هو أن من الأسماء اللي بعدها وليد الركراكي هاد المرة من المنتخب المغربي، هو أمين حارث لاعب أولمبيك مارسليا الفرنسي واللي متألق مع الفريق ديالو فاليوروبا اللي هو أحسن صانع ألعاب فهاد المسابقة فها الموسم.
وباش نحاولو نعرفو أسباب استبعاد وليد الركراكي لأمين حارث، بما أن الناخب الوطني ما غيديرش ندوة صحافية باش يشرح علاش قرر يستدعي كل لاعب ويجاوب على أسئلة الصحافيين اللي كانت غتطرق أكيد لغياب حارث المتألق مع مارسليا، غنرجعو لواحد التصريح دارو أمين حارث قبل أيام مع موقع "فوت ميركاتو" الفرنسي، وشرح فيه أسباب تراجع مستواه ملي رجع من كوب دافريك للفريق ديالو وقال فيه: "قبل ما نمشي نشارك فكوب دافريك كنت كنحس براسي بخير، ولكن مشى ليا الريتم حيث كان خاصني الوقت باش نولف ومن الفوق ما لعبتش بزاف، هذا ماشي عذر، ولكن ملي رجعت بحالي حسيت بتحسن، وكان خاصني الوقت باش نرجع الفورما بحال العام اللي فات، وكوب دافريك نقصت ليا من الريتم ديالي".
هذا الشي كيخلي المتتبع للمنتخب المغربي يشوف ان استبعاد لاعب بحال أمين حارث من المنتخب المغربي فهاد الوقت اللي هو متألق فيه مع أولمبيك مارسليا، واستدعاء لاعبين ما جاهزينش بحال حكيم زياش اللي ما كيلعبش مع الفريق ديالو گلطة سراي التركي، ويالاه دخل دقايق قليلة فاخر ماتش مع الفريق ديالو، انه استبعاد ماشي فمحلو وما عندو علاقة بالجانب التقني او بمستوى اللاعب وإنما عندو علاقة بهاد التصريح اللي دار حارث قبل ايام، وكيطرح تساؤل واش الركراكي انتقم منو ؟