عبر هشام الدكيك مدرب المنتخب الوطني المغربي للفوتسال على الفرحة ديالو حيث المغرب ربح كوب دافريك للمرة الثالثة فإنجاز غير مسبوق للكرة المغربية، والتأهل للمونديال للمرة الثالثة، وهدا الدكيك لاكوب للملك محمد السادس، وأكد أن السياسة ديال المغرب كانت ورا تألق منتخب الفوتسال، والتتويج باللقب هو ثمرة مجهودات گاع المتدخلين من لاعبين وأطقم وجمهور وجامعة الكرة وصحافة. Loading Ad 00:00 / 00:35 Ad ends in 35s وقال الناخب الوطني هشام الدكيك ملي ربح المغرب كأس افريقيا: "فرحانين بزاف باللقب الثالث على التوالي، اللي كنهديوه للملك محمد السادس، الراعي الأول للرياضة فبلادنا، وبصراحة استفدنا من السياسة الملكية ومن القاعات والملاعب واللاعب المغربي موهوب والبنية التحتية مناسبة". وكمل هشام الدكيك: "حنا مزيانين فالفوتسال ورائدين على الصعيد الأفريقي والعربي، ومنافسين على الصعيد العالمي، وهذا الشي راه نتيجة ديال سياسة البلاد كلها، واهتمام الجامعة الملكية المغربية بهاد النوع الرياضي وللي ولات رياضة معروفة عالميا وكاين اهتمام بها ولات عندها شعبية بحال كرة القدم". وزاد هشام الدكيك: "فكوب دافريك فرحنا من الأول حتى آخر البطولة، وكانت السيطرة من أول ماتش حتى لليوم، وملي كيتماركا علينا غير هدف ما كنكونوش راضيين، وهذا الشي اللي وصلنا له بفضل اللاعبين والأطقم والجمهور والصحافة، ودابا حنا أبطال إفريقيا للعام الثالث على التوالي وغاديين لاكوب دي موند للمرة الرابعة على التوالي".
