تعليمات خاصة من الكاف لمراقبة الصغيرة والكبيرة فديبلاصمون اتحاد العاصمة للمغرب تفاديا لتزوير الحقائق وكذوب الكابرانات

غيجيو اتحاد العاصمة الجزائري اليوم الجمعة فالعشية للمغرب، باش يلعبو مع نهضة بركان هاد الويكاند ماتش روتور كأس الكونفدرالية الإفريقية، والاتحاد الإفريقي لكرة القدم متبع كل صغيرة وكبيرة بسبب حساسية الماتش عند الجزائريين حيث الفريق الجزائري كيتعرض للضغوطات من طرف سلطات بلادو باش يبعد المباراة على جانبها الرياضي ويجرها للمشاكل السياسية.
وحسب المعلومات اللي توصل به موقع "گود" فالاتحاد الإفريقي لكرة القدم، غيكون صارم فماتش الروتور بين نهضة بركان واتحاد العاصمة الجزائري، خصوصا بعد واقعة ماتش الذهاب فالجزائر، وهو الماتش اللي تلغا بسبب حجز الكابرانات على تونيات الفريق المغربي، لدرجة أنهم وصلو لخرق القانون وتزوير تونيات النهضة البركانية باش يكذبو ويقولو أن الفريق المغربي عندو تونيات باش يلعب وما بغاش.
وتوصلو مناديب الاتحاد الإفريقي فماتش روتور دومي فينال كأس الكونفدالية بتعليمات من الكاف، باش ما يغفلو على حتى حاجة ملي يوصل الفريق الجزائري لمطار وجدة وحتى يرجع بحالو من نفس المطار، تفاديا لنشر أي إشاعات وتزوير للحقائق، خصوصا بعد تجربة ماتش الذهاب فالجزائر، اللي كانو فيه مسؤولين اتحاد العاصمة مستعدين يديرو أي حاجة باش يرضاو عليهم الكابرانات ولو يخرقو قوانين الكاف.
وبخصوص إقامة اتحاد العاصمة الجزائري، وحسب ما توصل به موقع "گود"، فالفريق غايوصل لمطار وجدة مع 5 العشية ومن بعدها غيمشيو يگلسو فأوطيل 5 إيطوال فالسعيدية وراه وفرت إدارة نهضة بركان هذا الشي بالإضافة للكار اللي غيديبلاصا فيه الفريق بين وجدة والسعيدية وبركان فالتداريب ديالو وباش يلعب الماتش.