قلق فالاتحاد الجزائري لكرة القدم. خايفين توصل عقوبات الكاف فماتش بركان و USMA للأندية والمنتخبات الجزائرية

كيعيش الاتحاد الجزائري لكرة القدم قلق كبير بسبب ملف قضية ماتش نهضة بركان واتحاد العاصمة، اللي ما تلعبش بسبب حجز السلطات الجزائرية لتونيات الفريق المغربي فخرق سافر لقانون الاتحاد الإفريقي، وهاد الشي خلا الكاف يلغي الماتش ويحيل الملف على اللجان ديالو المختصة.
الاتحاد الجزائري لكرة القدم كيعيش استنفار كبير، واليوم الثلاثاء داير المكتب الفدرالي ديالو اجتماع برئاسة رئيس الاتحاد وليد صادي، ومخصص هذا الاجتماع لدراسة تداعيات ملف ماتش ذهاب دومي فينال كأس الكونفدرالية الأفريقية بين النهضة البركانية واتحاد العاصمة اللي ما تلعبش، على الاتحاد الجزائري لكرة القدم، حيث ماشي غير فريق اتحاد العاصمة اللي غيكون معني بالعقوبات من طرف الكاف ولكن راه تقدر توصل حتى للأندية والمنتخبات الجزائرية.
وحطو الكابرانات الاتحاد الجزائري لكرة القدم وفريق اتحاد العاصمة فموقف خايب ما يتحسدوش عليه، ملي حجزو على تونيات نهضة بركان فمطار هواري بومدين، وعدم استجابتهم لتحذير الكاف باش يرجعو التونيات للفريق المغربي باش يتلعب الماتش، ولكن زادو فيه ومشاو زورو التونيات ديال النهضة البركانية وداروهم بلا خريطة المغرب، فتصرف لا أخلاقي ولا رياضي وخارق لقانون الكاف، وهذا الشي خلا الاتحاد الأفريقي يلغي الماتش ويحيل الملف على اللجان المختصة.