عسكر لالجيري مازال زايد فهبالو ومگدم اتحاد العاصمة: باغيين يجيوب تونيات ميطاسيون لنهضة بركان والفريق المغربي رافض وباغي يطبق قرار الكاف

كتواصل السلطات الجزائرية التعنت ديالها، ومازال ما بغاتش تطبق تعليمات الاتحاد الإفريقي لكرة القدم، وترجع التونيات للفريق باش يلعبو الماتش ضد اتحاد العاصمة الجزائري اليوم الاحد فالعاصمة الجزائرية، ومازال زايدين فعنادهم فخرق القانون.
اتحاد العاصمة الجزائري باغيين يمشيو لتيران 5 جويلية ويجيبو معهم تونيات آخرين باش يعطيوهم زعما لنهضة بركان يلعبو بهم الماتش، فخرق كبير لقانون الاتحاد الأفريقي، حيث ما يمكنش الكاف يخلي هذا الشي يوقع لأن التوني اللي مصادق عليه فالاجتماع التقني هو التوني ديال نهضة بركان الحقيقي اللي محجوز عليه من طرف السلطات الجزائرية.
من جهتهم غيمشيو نهضة بركان حتى هما للتيران، وما غيلعبوش إلا بالتوني الأصلي ديال الفريق اللي فيه خريطة المغرب اللي معتمد من طرف الاتحاد الافريقي لكرة القدم، ومن غير هذا الشي فالفريق ما غيلعبش الماتش وغيطبق قرار الكاف وهو إما السلطات الجزائرية ترجع تونيات نهضة بركان للفريق ويتلعب الماتش وإذا ما بغاتش الجزائر تطبق هذا الشي فالماتش ما غيتلعبش وغيتعاقبو اتحاد العاصمة ويخسرو الماتش أمام نهضة بركان.