القضاء الإسباني حكم لسكرتيرة ضد قنصلية مغربية. محكمة مورثيا قررت باش ترجع لخدمتها الأصلية وتستافد من تعويض ديال 50 ألف يورو

بعد ما رفعات دعوى قضائية ضد القنصلية المغربية بسباب "التحرش في مكان العمل والطرد التعسفي". قررت المحكمة الاجتماعية رقم 1 بمورثيا الحكم لفائدة المشتكية واعتبرت أن فصلها عن العمل باطل وخاصها ترجع للخدمة الأصلية ديالها بأثر فوري، مع دفع الصاليرات ديالها ابتداء من نفاذ الطرد بمعدل 56.89 يورو يوميا، فضلا عن دفع تعويض قدره 25.000 يورو من جهة و26.086.76 يورو كمصاريف أخرى.
وقالت جريدة "لا أوبينيون دي مورثيا"، أن كاتبة ف القنصلية المغربية في مورثيا رفعات دعوى قضائية بسباب "التحرش في مكان العمل والطرد التعسفي"، وتدعي العاملة أنها فقدات وظيفتها بعد ما دخلات من كونجي مطول لأنها تأثرات نفسيا من الإهانة اللي تعرضات ليها من دبلوماسي.
وقالت المدعية في شكايتها، أنها بدات كتعرض للتحرش في مكان العمل ابتداء من 2021، عبر تقديم الهدايا، ولمسها جسديا بلا إرادتها، وكعقاب على رفضها تم نقلها إلى طابق ما فيهش إنترنت وبدا كلشي كيتجاهلها، قبل ما يتم فصلها من الخدمة ديالها في القنصلية.