بسباب كورونا.. موظفي “لارام” غايوليو يخدمو نص نهار ومنهم اللي غاياخد كونجي بلا خلاص لمدة 6 شهور – وثيقة

بسباب انتشار فيروس “كورونا” فكَاع انحاء العالم، ونظرا لصعورة الظرفية الحالية، الخطوط الملكية المغربية “لارام” فرضات على الموظفين ديالها ترتيبات جديدة فتوقيت الخدمة، وهذشي بشكل مؤقت.
فمذكرة لقطب التنمية والدعم ف”لارام”، توجهات لموظفي لارام اليوم الخميس، وتوصلات “كود” بنسخة منها، شركة الطيران المغربية عطات الحق للموظفين ديالها ياخدو كونجي بلا خلاص من شهر حتى لست شهور، هذ الكونجي غايمكن للموظفين يستافدو فيه من التخفيضات المعمول بيها على التذاكر ديال الطيارة، من المساهمات ديال “لاسينيسيس” “السيمير” والضمان الاجتماعي، كذلك غادي يكون عندهم الحق ياخدو تسبيق، على أساس يرجعوه فاش يبداو الخدمة من بعد ما تسالي المدة دالكونجي.
الموظفين د”لارام” غيوليو يخدمو غير نص نهار وماشي نهار كامل، وهذشي لمدة 3 شهور وتقدر تولي 6 شهور على حساب طبيعة الأزمة، هكذا عند الموظفين الحق يختارو بين الفترة الصباحية، يعني من ال8 ل12 وربع، ولا الفترة المسائية، يعني من الوحدة لارب لل5.
بالنسبة اللي مازال كايتسالو كونجي ديالهم العادي وماخداوهش، باش مايميشيش ليهم غايخصهم ياخدوه من دابا حتى ل30 يونيو، عندهم ياخدوه فالفترة اللي بغاو لكن خاصهم يحطو ال”بلانين” ديالو قبل اللول ديال أبريل، ولكن ماشي كلشي غاياخدو، لكن غير الناس اللي “لارام” ماغاتحتاجهمش فالخدمات ديالها، وهي غاتشوف دكشي وفقا للاحتياج ديالها.
وعلنات لارام تعليق رحلاتها اليوم لكل من إسبانيا والجزائر بسبب انتشار فيروس كورونا، وكانت فوقت سابق علقات رحلاتها للإيطاليا، وقبل كَاع للشينوا، بسبب انتشار الفيروس القاتل، اللي اعتبراتي منظمة الصحة العالمية “جايحة”.