اسبانيا كاتخوور، وحنا قلنا ليها ماكاتعرفيش..وتسنى آبا مزوار حتى تقواد عاد تقول لينا آجيو نديرو مسيرة !!

عبد اللطيف اكنوش استاذ باحث جامعة الحسن الاول سطات////
آش طاري في إسبانيا؟؟ واحد التويشية كاتهم المغاربة…كاتهم المغاربة ولكن مع الأسف المغاربة ما مسوقينش ليها..
في الحقيقة للي حاكمينا هوما للي ما ممسوقينش ليها، أما حنا "بقر علال" واخا ندويو حتى نعياو، ماغادي يدديها فينا حد..لسبب بسيط هو أننا باقي لينا وبين الديمقراطية واحد عشرين مليون سنة ضوئية..
لقيت راسي كانتساءل غير بوحدي بحال المسططي: "واش قضية الصحراء، للي هيا القضية الأولى ديال المغاربة، واقع فيها التخوفيش عند صحابنا صبنيول للي حنا كانطببلو ونزغتو للعلاقة المتميزة للي رابطانا بيهم، وللي حاكمينا ضاربين الطم؟؟"..غادين تقولو ليا آش طاري ثاني، نتا داير بحال موكا كاتجيب لينا غير لخبار الخايبة بحال كمارتك..ما كاين مشكل هاهو للي مقللقني..
واحد السيد صديقي وخويا عطاني واحد لخبار مقودة، لجنة العدل في مجلس النواب بالغرفة السفلى في البرلمان الإسباني، عطات الضوء الخضر بالإجماع لواحد المبادرة أطلقتها كُتلة "كُومبروميس"، وللي هيا كتلة نيابية كاتنتامِي لحركة الحكم الذاتي ديال منطقة "بلنسية" Valencia..هاذ المبادرة كاتهدف للاعتراف "بالصحراءِ الغربيّة" كإقليم مرتابط تاريخيا بإسبانيا وبذلك…هاذ الاعتراف غادي يترتب عليه أن سكان الصحراء يمكن ليهم ياخدو الجنسية الإسبانية من بعد سنتين من الإقامة في إسبانيا…
هاذ الويل مابقى غير يدوز للتصويت في جلسة علنية ويصبح قانون..
تذكرو معايا الله يجازيكم ذاك النهار مللي قررو ثاني اسبنيول يعطيو الجنسية الإسبانية لليهود المغاربة بحجة أنهم كانوا من ضحايا الجلاء ديال ديك الملكة ديالهم الزوينة في 1492، واستثناو من هاذ الإجراء المسلمين "الهورناشيرويس والموريسكوس" للي حتى هوما بحال خوتهم اليهود جراو عليهم بكري، من دون ما المغرب مايحتج واخا غير بالفانت..
غريب والله إيلى غريب..سيدي مزوار وصحابو غادين يبقاو ضاربين الطم حتى تخماج هاذ المصيبة ديال صحابنا للي النهار وماطال وهوما آجي آسي الحموشي شوف لينا الإرهاب من هنا، شوف لينا الإرهاب من لهيه، آجي آالمغرب عاونا في مصائب الهجرة، حمي لينا مليلية من الأفارقة لا يهجمو علينا، وزيد وزيد..واش حنا ماعندنا نفس ولا؟؟ كيفاش جماعة من نوابكم يعتارفو ليا ببلاد، هي ديالي، كمنطقة مرتابطة تاريخيا بإسبانيا؟؟كيفاش؟؟
غادي تبقاو تتسناو حتى يبدا يعوم علينا الما، عاد ثاني تمشيو تنقلو ليا بنادم في الكيران وتجيبوه للرباط باش يدير المسيرات، وعوض يحتج على إسبانيا، يبدا يحتج على دولة "كوكوريكو" بحال للي دار ذاك النهار معا المعممش ديال بان كيمون..