"الوريقات ديال الباناما" أو Panama papers وررقات شلا بنادم..ولكن الحذر واجب آ الإخوان..إيلى كان التهيطير من فضة، فراه التريث ذهب…

كود عبد اللطيف اكنوش استاذ باحث في جامعة الحسن الاول سطات ///
Offshore هي كلمة أنجليزية كا تعني "بعيد من الشاطئ"، "في قاع البحر"، "بعيدة من الحدود
ديال البلاد"…وأنا كانزيد من عندي : هي ديك البنوك للي كاينة في الثلث الخالي، وللي معفية من الضرائب، وكاتجمع الفلوس من عند الكبار ديال العالم بلا تفضحهم، بلا ما تدير محاسبة نظامية خاصة، بلا مولاي بويه…
واحد المكتب ديال الاستشارة المالية في الباناما سميتو : Mossack Fonseca هو ولد الحرام للي مكلف بجمع أموال ديال عباد الله للي باغين يصيفطو فلوسهم لهاذ البنوك ديال "الثلث الخالي"…ومهمتو هي القيام بهاذ العمليات..
هاذ العمليات عادة ماشي ممنوعة من قبل دول المعمور، ولكنها مؤطرة من طرف القانون باش ديك الأموال للي كاتمشي للثلث الخالي تخلص "كامام" الضرائب للي عليها لبلادها…ولكن غالبا الأمور ما كاتدوزش بحال هاكا..يعني كايكون شويا التخوفيش ديال الناس الكبار…وهو شيء طبيعي عند بني البشر للي "خلق هلوعا، إذا مسه الشر جزوعا، وإذا مسه الخير منوعا"…
المكتب ديال الاستشارة المالية للي كاين في الباناما تصيد مسكين على ماكال والله أعلم…شي رهوط حزقو ليه بتقريبا 11 مليون ديال الوثائق ديال الكليان ديالو، وداوها لواحد الجورنال ألماني..هاذ الجورنال ولد الحرام اتاصل بواحد 109 هيئات التحرير ديال الصحف عبر 76 بلاد من العالم، وكل جريدة أو مجلة تكلفات بالضواصا اللي كاتهم الكبار ديال بلادها..وآجي تشوف…الخلعا هزات ليك عرمة ديال بنادم من الشرق حتى الغرب، ومن السند حتى للهند…
ماخلاو اللاعب ميشال بلاتيني، ماخلاو ميسي ديال البارصا، ماخلاو صحاب فلاديمير بوتين، ما خلاو الوزير الأول ديال إيزلاندا سيكموندور كونلوكسون، ما خلاو الرئيس ديال أوكرانيا بوروشينكو، ماخلاو ملك السعودية، ماخلاو الله يستر حتى واحد في الدنيا وما جبدوهش..وا 140 بلاد كا يهمها الأمر…وكون كان سيدي عبدالإلاه ابن كيران مرفح شويا، والله حتى هو لا عتقوه، ولكن مسكين مكررد بحالنا، فيه غير الهضرة والتهايطير، حازق بحالنا، ولكن ما كايحشمش…
راني داوي بالمعقول، ما يغرركمش تهدريزي والطنز العكري ديالي…هاذ الفضيحة كاتبان ليا ماشي حتى للهيه، لأنها كاتوضع علينا أسئلة كثيرة وكبيرة…شكون عندو المصلحة في تسريب هاذ العجب؟ وعلاش تم التسريب ديالو؟ وعلاش التأكيد كثار من اللازم على فلاديمير بوتين وصحابو وعلى بلدان بعينيها من دون بلادات خرى؟ وعلاش ملك السعودية؟ وعلاش بلاتيني مع أنه حويزق حتى هو ماشي كااااع مرفح بزاف؟ وعلاش ذاك المزنفخ ديال الوزير الأول ديال إزلاندا للي ماكيعرفو حد؟؟ وزيد وزيد..الواحد هو يرد بالو ويعرف آشنو كايخررج على درقوشو، حتى نشوفو فاين غاديا هاذ البيعة وشريا…