الجادارمي والبوليسي والقاضي، ممنوع عليهم تقمص دور الواعظ الديني، ولابد يعملو بمبدأ "لا جريمة إلا بنص" ويعملو بمبدأ "عدم الاجتهاد في القانون الجنائي"…

عبد اللطيف اكنوش استاذ وباحث جامعة الحسن الاول سطات/////
هاذو واحد الجوج ديال الوليدات مغاربة اعتانقوا المسيحية من مدة هاذي، واحد منهم سخسخوه الجادارمية في منطقة العرجا في سلا، والآخر محنوه حتى هووا في مدينة كلميم…قريت هاذ الخبر في واحد الموقع إخباري على هاذ الشكل: " طالبت الفدرالية الوطنية للجمعيات الأمازيغية بفتح تحقيق قضائي حوْل واقعتيْ مَسٍّ بحريّة مواطنيْن مغربيين في المعتقد، يعتنقان الديانة المسيحية، قالا، في شكايتين توصلت بهما الفدرالية إنهما تعرّضا "للتوقيف والاحتجاز التعسفي"، من طرف عناصر الشرطة والدرك، في مناسبتين منفصلتين، في منطقة العرجات نواحي مدينة سلا، وفي مدينة كلميم"… وأن هاذ الفيدرالية وضعات هاذ الشكايات عند وزير العدل والحريات، زعما سيدي المصطفى الرميد، وعند الوزير الأول في حكومة سيدنا، سيدي عبدالإلاه ابن كيران…آش غادين ثاني تقولو ليا؟؟؟
عارف أن شي قماقم غادين يقولو ليا :"غزا فبوهم الله..حينت حنا في بلد مسلم، والدستور كا يقولها"، وغادين يصدعو ليا دماغي بما قال الله ورسول الله وشي كلام خور كيرددوه بحال البيروكيات وهوما ما فاهمين فيه حتى وزة…غادين ينيبوني بالهضرة غير بدافع أن هاذ الوليدات كا يختالفو معاهم في طريقة التفكير والمعتقد، ومتشبثين بحريتهم الفردية.
..
شي وحدين خرين غادين ينيبوني بطريقة خرى حتى هوما…غادين يقولو ليا :"ونتا مالك، آش حرك شطاتك ولى غير باغي تهضر؟؟ ثاني جبدتي لينا هاذ الكلام على حرية المعتقد؟ باغي تشعل العافية بين المغاربة ثاني بهاذ المصيبة ديال الحرية الدينية…سير خلينا عليك، عندنا مشاكل خرى مهيييييييمة بزاف على الحرية، بحال التعليم والبطالة والاقتصاد وبززززاف… يالله عطينا التيساع ! "
ولكن بلاتي الله يجازيكم بخير…غير سمعو قصة هاذ الوليدات، وشوفو نتوما واش هاذ شي باقي يقدر يقبلو شي مغربي حر من بعد 2011…الدراري سخسخاتهم السلطة المكلفة بإنفاذ القانون في المخافر، وشدوهم لسعات عديدة وهوما كا ينيبو فيهم…آسمك؟ آسم مك؟ ماحشمتيش تعتنق المسيحية يا ولد الحرام؟ والله حتا نخرجو منك هاذ المسيحية بلها يثبتو ليك..وحتى طلقوهم وتبعوهم –على ما قالو الدراري- وبداو كيحرشو عليهم دوك الموطنين للي ما مواطنين والو، وقا يقولو ليهم :"راه هادو خرجو من الإسلام" !
!
وانخلييييييكم تصورو نتوما آش يمكن يصدر على رباعة ديال الجادارميا ما قارين قرآن، ما قارين إنجيل، ما قارين توراة، ما عارفينش حتى أن السلطة المكلفة بإنفاذ القانون ملتزمة بمبدأ الحياد العقدي والديني، وما عارفينش حتى أن القانون للي مفروض فيهم يطبقوه وبس، ما كا ينصش إطلاقا على تغيير المعتقد من طرف المواطن، وزيد وزيد وزيد
.
أما من جيهتي، راكم عارفيني غير طوبيس…علموني هاذي 50 عام في السنة الأولى ديال الحقوق بأن "لا جريمة بدون نص"، وعلموني أن القاضي الجنائي ممنوع عليه يجتاهد من عندو خلافا للقاضي المدني..وانا كيف لحمار علمت هاذ شي لوليداتي الطلبة من عام نوض تركدو…إيوا آش ندير وآش نقول؟
تغيير المعتقد وتغيير الدين من طرف المواطن ماشي جريمة وعمرو ما كان جريمة، لأنه ببساطة القانون ديالنا ما كا يقول حتى زفتة في هاذ الموضوع..والقاضي ما عندوش الحق بثاثا أنو يجتهد..ما كاينش الجريمة في النص ما كاينش عقوبة، سدين… ما عند الحق لا للجادارميا، لا للبوليس، لا للقضاء أنو يقلق راحة المواطن للي غير الدين ديالو..
كاينين شي مسامر الميدة للي غادين يصدعو ليا دماغي ويقولو ليا: "لا آ البعر..راه القانون الجنائي كاين فيه جنحة زعزعة عقيدة مسلم من طرف غير المسلمين"…آييه كاينة، ولكن هاذ الدراري فين شفتوهم كيزعزعو ولا كايفعفعو عقيدة شي قمقوم…ثم، مال هاذ العقيدة ديال المسلم غير على سبة ولا؟ إلى تزعزعات راها مزعزعة مللي خرجات من الخيمة ومن الأساس..
.
ولكن احبس آعزيزي…للي كا نعرف أنا، هو أن الجنحة ديال زعزعة عقيدة مسلم مزيرها القانون الجنائي وحاط ليها شروط مضبوطة بزاف، إلى نتافات هاذ الشروط، الجنحة ما كتبقاش..آشنو هيا هاذ الشروط؟؟ أن يكون التبشير في أماكن وفي أوساط كاتعاني من الهشاشة الاجتماعية والاقتصادية والعقلية، والقانون كا يضبطها على الشكل التالي: السجون، المستشفيات، والمؤسسات ديال اليتامي أو الخيريات..
من غير هاذ الأماكن، ما كاين لا جنحة زعزعة عقيدة مسلم ولا هم يحزنون…
ولكن أنا ماشي هاذ التويشيات للي قلقاتني، لا…للي فقسني هو التصرف غير اللائق ديال الجادارميا، إلى صح الكلام ديال الدراري…رجل السلطة المكلف بإنفاذ القانون يمنع عليه أن يتحول إلى واعظ ديني، أو مبشر ديني، ويمنع عليه حتى أن يظهر للملأ تدينه وميولاته العقدية، حتى يكون منضبطا لمبدأ الحياد في عمله وتطبيقه للقانون…بل ويجب عليه أن يكون ملما بتفاصيل هذا القانون الذي انتدب من أجل تطبيقه في الشارع العام..وهاذاك الشي علاش ممنوع عليهم يديرو اللحايا وممنوع على العيالات للي خدامين معاهم يديرو الزيوفا..
.
ملحوظة: الله يجازيكم بخير للي بغا يعقب ولا يعلق يستعمل ضمير المتكلم المفرد، يعني "أنا"، ويخليني عليه من استعمال ضمير المتكلم الجمع يعني "نحن"..ميرسي بوككو…