الداهية الياس والتابع لشكر: الاتحاد الاشتراكي: الخاسر الاكبر في قضية الاساتذة المتدربين. قبل يلعب دور كومبارس بلا شخصية والبام طلع الرابح الاكبر

انتهت قضية الاساتذة المتدربين بانتصار لهؤلاء واخا ما غادينش يتوظفو الا شهر يناير والحكومة اقترحات عليهم 7 الاف فهاد العام و3 بداية السنة المقبلة، ما علينا. المهم ان هذه القضية اللي تسيسات بزاف بزاف. كلشي بغى يركب عليها من اليمين =الاسلامي= العدل والاحسان واليسار بتفاصيله =النهج والطليعة ثم احزاب المعارضة =البام وتابعها الاتحاد الاشتراكي= فحزب الاستقلال والنقابات وحتى احزاب الاغلبية =فضيحة رد وزير المالية على مراسلة لفريقي البام والاتحاد في مجلس المستشارين= ثم التقدم والاشتراكية اللي تقرب من البام.
دابا شكون ربح منها. سياسيا الاصالة والمعاصرة مع امينه العام الياس العماري لعب دور فهاد الشي. دور كبير كاع. ضمس الكارطة وتعاود كلشي. الياس استقبل اكثر من مرة الاساتذة المتدربين وفاوضهم بفيلا ماندارين بالرباط. استقبلهم بحالهم بحال كل الشخصيات لكبار اللي كتجي عندو. يعني كبر ليهم الشان ورجعهم مهمين بزاف. الجانب النفسي مهم في المفاوضات. هاد الشي خلاهم يثيقو فيه. البام باش ما يبقاش بوحدو جاب معاه الاتحاد الاشتراكي وادريس لشكر. طبعا حتي شي مسؤول على تنسيقية من الاساتذة المتدربين ما غادي يثيق فلشكر. ثاقو حقاش كاين الياس العماري.
الاتحاد الاشتراكي قبل يلعب الكومبارس والبطولة لعباتها الاصالة والمعاصرة. قضية الاساتذة بينات لينا الوضعية اللي كيعيشها الاتحاد الاشتراكي. وضعية صعيبة وظهرات القوة ديال الاصالة والمعاصرة زمن الياس العماري.